Олими тоҷик раиси Консорсиуми «Донишгоҳи ҳуқуқии АвруОсиё»

Директори Донишкадаи такмили ихтисоси омӯзгорони муассисаҳои таҳсилоти олии касбии Тоҷикистон Хайрулло Мирзамонзода ба ҳайси раиси Консорсиуми «Донишгоҳи ҳуқуқии АвруОсиё» интихоб шуд.

Интихоби олими тоҷик ба раҳбарии ин консорсиум дар пайи ҷаласаи пленарии 16-уми Конгресси ҳуқуқии АвруОсиё, ки дар шаҳри Екатеринбурги Федератсияи Русия баргузор шуд, сурат гирифт. Дар ин консорсиум 10 донишгоҳи кишварҳои узв ва нозири Иттиҳоди иқтисодии АвруОсиё узвият доранд. Ин консорсиум, ки соли 2007 таъсис ёфтааст, рушди ҳамкориҳои донишгоҳҳои ҳуқуқии пешрави кишварҳои узв ва нозири Иттиҳоди иқтисодии АвруОсиё ва ҳамчунин кишварҳои алоқаманд ба рушди ҳамкориҳои тиҷорӣ ва иқтисодӣ бо ин иттиҳодро ҳадаф қарор додааст.

Профессор Хайрулло Мирзамонзода, доктори илмҳои ҳуқуқшиносӣ, беш аз 7 сол муовини ректори Донишгоҳи миллии Тоҷикистон оид ба робитаҳои байналмилалӣ буда, як соли охир директори Донишкадаи такмили ихтисоси омӯзгорони муассисаҳои таҳсилоти олии касбии Тоҷикистон аст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube