Президент қирғизҳои Помирро кӯчонданист

Хадамоти матбуоти президенти Қирғизистон мегӯяд, Содир Ҷабборов бо қирғизҳои қавмие, ки аз Помири Хурди Афғонистон ба деҳаи Талди-Суси минтақаи Олойи вилояти Ош кӯчидаанд, мулоқот кард.
«Мушкилоти қирғизҳои Помир маро доимо ба ташвиш меорад. Майлу хоҳиши ба ватани таърихии худ кӯчонидани онҳо дар сарам кайҳо боз чарх мезанад ва ҳоло ман ният дорам, ки ин нақшаҳоро амалӣ кунам», — менависад Sputnik Қирғизистон аз қавли президент.
Дар сӯҳбат бо қирғизҳои Помир Ҷабборов дар бораи нияти кӯчонидани қирғизҳои боқимондаи афғон ба ватани таърихии худ то зимистони имсол гуфт, «давлат барои ин мақсад нерӯ ва воситаҳои кофӣ дорад».
Вай инчунин қайд кард, ки қирғизҳои помирӣ, ки дар соли 2017 кӯчонида шудаанд, ҳанӯз ҳам бо мутобиқшавӣ мушкил доранд ва маҷбуранд, ки доимо аз мақомот кумак пурсанд.
«Ин масъала таҳти назорати ман хоҳад буд. Мо кумак мерасонем ва барои таъмини мардуми муҳоҷир бо гармӣ, барқ ва ҳама чизи зарурӣ маблағ ҷудо мекунем», — таъкид кард Ҷабборов.
Дар навбати худ, қирғизҳои Помир аз президент хоҳиш карданд, ки дар ҳалли як қатор мушкилот: ташкили сафарҳо ба Помир, дарёфти ҷои кор, таҳсилоти ҷавонон, суръат бахшидан ба низоми гирифтани шаҳрвандӣ, кумак кунад.
Ҷабборов қайд кард, ки мақомоти дахлдори давлатӣ дар ояндаи наздик ба таҳияи масъалаҳое, ки дар ҷаласа садо доданд, аз ҷумла дар бораи ҳарчи зудтар додани шаҳрвандии Қирғизистон ба қирғизҳои кӯчонидашудаи Помир оғоз хоҳанд кард.
Вай диққати мақомоти маҳаллиро ба зарурати барвақт табдил додани қитъаи замин ба як шаҳраки ягонаи Помир ҷалб кард, ки дар он муассисаҳои таълимӣ ва иҷтимоиро таъмин кардан зарур аст. Ба гуфтаи ӯ, роҳандозии ин масъала бояд имсол оғоз шавад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube