Рӯзи санитарӣ дар “Корвон” тағйир ёфт

Рӯзи санитарӣ дар бозори «Корвон» аз рӯзи ҷумъа ба душанбе гузаронида шуд. Акнун ҳар ҳафта — рӯзи душанбе бозори “Корвон” фаъолият намекунад ва дар он корҳои тозакунӣ ва безараргардонӣ (дезинфексия) сурат мегирад. Дар ин бора аз маъмурияти бозори “Корвон”  ба Pressa.tj иттилоъ доданд.

Ҳоло бозори «Корвон» калонтарин маркази тиҷорат дар пойтахт аст, ки дар он беш аз 10 000 нафар соҳибкорону кормандон фаъолият доранд. Чанд соли охир бо бунёди биноҳои муҳташам, шароити беҳтари тиҷорат бозор симояшро комилан дигар кардааст.

Таваққуфгоҳе, ки дар “Корвон сити” бунёд шудааст, мувофиқ ба талаботи муосири шаҳрсозӣ мебошад. Таваққуфгоҳ дар масоҳати бештар аз 14 ҳазор метри мураббаъ сохта шудааст. Дар як вақт беш аз 500 адад воситаи нақлиёт имкон доранд, ки дар он барои таваққуф қарор гиранд. Таваққуфгоҳ аз 6 ошёна ва таҳхона иборат аст.

Дар ошёнаи болоии бинои таваққуфгоҳ маркази назорати мушоҳидавӣ ҷойгир аст. Дар ин марказ бо истифода аз 12 монитор ва 171 камераи мушоҳидавӣ масъулин тартиботи бозорро назорат менамоянд.

Тамоми таҷҳизоти техникии насбгардида насли нави ширкати маъруфи Хиквижн (Hikvision) аст. Атрофи бозор дар масоҳати бештар аз 2 ҳазор метри мураббаъ назорат мешавад.

Ҳамчунин, дар ин марказ системаи огоҳкунандаи зидди сӯхтор насб карда шуда, дар ҳолати бонги хатар аз ин ҷо муайян карда мешавад, ки ҳодиса дар кадом даромадгоҳ ва ё кадом қатори бозор рух додааст.

Умуман, Маркази савдои «Корвон сити» дар масоҳати бештар аз 107 ҳазор метри мураббаъ таъмиру навсозӣ гардидааст. Ҳадаф фароҳам овардани шароит барои соҳибкорон мебошад.

Ҳоло “Корвон” на танҳо макони тиҷорати бузурги молу коло дар шаҳри Душанбест, балки ба саёҳатгоҳи меҳмонони дохиливу хориҷӣ низ табдил ёфтааст. Яъне, “Корвон” имрӯз яке аз муаррифгарони симои Душнабе мебошад.

P.S
Тавре ки Pressa.tj хабар ёфт, тамоми бозорҳои Тоҷикистон рӯзи санитариро аз ҷумъа ба рӯзи душанбе гузаронидаанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube