Резаахбор: Аз қоидаи нави FIFA то харидани Фирминио

Созмони ҷаҳонии футбол (FIFA) қоидаи нави ҳолати нобозӣ (офсайд)-ро тасдиқ кард. Аз ин пеш агар як қисми бадани ҳамлавар аз муҳофиз пеш мебуд, ҳолати нобозӣ ҳисоб мешуд, ҳоло тибқи қонуни нав бозигари ҳамлавар агар пурра аз ҳарифи муҳофиз пеш бошад, офсайд ҳисобида мешавад. Нидерланд, Шведсия ва Итолиё аввалин кишварҳое ҳастанд, ки ин тарҳи навро ҷорӣ хоҳанд кард.

***

Федератсияи байналмилалии ҷудо тақвими мусобиқоти соли 2024-ро тасдиқ кард, ки дар он рӯзҳои баргузории Гран Прии Душанбе низ маълум шуданд. Ин мусобиқа рӯзҳои 3-5-уми майи соли 2024 баргузор мешавад. Дар Гран Прии Душанбе-2023, ки бори аввал дар Тоҷикистон баргузор шуд, 315 варзишгар аз 40 кишвар дунё иштирок карданд.

***

Лигаи футболи Тоҷикистон дар таътили тобистона барои дастаҳои ҷавонони Лигаи олӣ Ҷоми «Ҷавонӣ»-ро баргузор мекунад. Маблағи умумии ҷоизаҳои мусобиқа 60 ҳазор сомониро ташкил медиҳад. Аз рӯи натиҷаи қуръакашӣ ба гурӯҳи «А» «Ҳосилот», «Файзканд», «Эсхата» ва «Регар-ТадАЗ» шомил гардиданд. Гурӯҳи «Б» аз «Хуҷанд», «Хатлон» ва «Кӯктош» иборат аст. Дар гурӯҳи «В» дастаҳои «Истиқлол», «Равшан» ва КМВА бозӣ мекунанд.

***

Клуби футболи «Ал-Аҳлӣ» аз харидани футболбози маъруфи бразилӣ Роберто Фирминио хабар дод. Дастаи арабӣ бо футболбози собиқи «Ливерпул» (Англия) то соли 2026 шартнома бастааст. Фирминиои 31-сола мавсими гузашта дар 25 бозӣ ширкат карда, 11 гол задааст. Дастаи «Ал-Аҳлӣ» чанде пеш бо дарвозабони «Челси» (Лондон) низ шартномаи ҳамкорӣ баста буд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube