Русия ба Украина 565 миллиард доллар зиён расонидааст

Муовини нахуствазири Украина мегӯяд, ки ҳамлаи низомии Русия ба ин кишвар то кунун 565 миллиард доллар зиён расонидааст.

Юлия Свириденко рӯзи 28-уми март дар паёме дар «Фейсбук» навишт:

• «112 миллиард доллар аз ин зиён марбут ба тавлиди нохолиси дохилии кишвар;
• 119 миллиард доллар ба зербиноҳо, аз ҷумла, ҳашт ҳазор километр роҳи оҳан, истгоҳҳои роҳи оҳан ва фурудгоҳҳо;
• беш аз 90 миллиард доллар зиён ба биноҳои истиқоматӣ, мошинҳо ва манбаъҳои хӯрокворӣ;
• 80 миллиард доллар хисорот ба ширкатҳо ва созмонҳо;
• 54 миллиард доллар зиён ба сармоягузориҳои мустақим;
• 47 миллиард доллар ба манбаъҳои буҷети кишвар будааст».

Ӯ изҳор дошт, ки мутаассифона, ҳар рӯз ҳаҷми зарарҳо афзоиш меёбад ва ба ҳамин сабаб, бо вуҷуди ҳама монеаҳо, Украина дар садади гирифтани ҷуброн аз Русия, ҳам аз роҳҳои ҳуқуқӣ ва ҳам манбаъҳои масдудшудаи ин кишвар аст.

Муовини нахуствазири Украина дар идома гуфт, ки «Русия пайомадҳои аъмоли ҷинояткоронаи худро дар Украина хоҳад дид».

Русия дар беш аз як моҳи ҳамлаи низомии худ баъзе шаҳрҳои калони Украина, аз ҷумла, Мариупол ва Харковро сахт бомбаборон кард ва зербиноҳои ин кишварро то ҳадди нобудии комил расонд.

— То кунун наздик ба 300 миллиард доллар аз захираҳои пулии Русия дар хориҷ масдуд шудааст. Кишварҳои ғарбӣ ҳамчунин дар садади кашф ва мусодираи дороиҳои олигархҳои руси наздик ба ҳукумати Русия ҳастанд,- менигорад Радиои Озодӣ.

Русия рӯзи 24-уми феврали имсол ба Украина ҳамла кард. Русия ин ҳамлаи худро «амалиёти вижаи низомӣ» мехонад, аммо Киев онро «таҷовуз» ба тамомияти арзии худ медонад.

Дар ин ҷанг то кунун аз ҳар ду ҷониб садҳо нафар кушта шудаанд. Украина мегӯяд, ки дар миёни қурбониён даҳҳо зан, кӯдак ва пиронсолон ҳастанд. Музокироти ҷонибҳо барои қатъи ҷанг ҳанӯз бенатиҷа будааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube