Шаҳрванди Қирғизистон дӯстони тоҷик пайдо кард

Аъзои гурӯҳи тамосии ҷавонони деҳаи Самарқандаки кишвари Қирғизистон баҳри ошноӣ аз фаъолияти соҳибкорони вилояти Суғд дар нимаи аввали рӯз ба шаҳри Хуҷанд омаданд. Онҳоро дар ин сафар 23 нафар ҳамсолонашон  аз деҳаи Чоркӯҳи шаҳри  Исфара ҳамроҳӣ карданд.

Имрӯз бо ташаббуси Ассотсиатсияи зиёиёни илмию техникии Тоҷикистон дар робита бо Фонди ҷамъиятии «Таҳаммулпазирии байналхалқӣ» дар Қирғизистон чорабинии «Бизнес-стади тур» дар доираи лоиҳаи «Тақвияти ҳамкории ҷавонон дар ноҳияҳои наздисарҳадии Тоҷикистону Қирғизистон» бо дастгирии Барномаи рушди СММ дар Тоҷикистон доир гардид. Тибқи нақшаи чорабинӣ иштирокчиён аз сехи қаннодии «Шириниҳои Тоҷикистон» дидан намуданд. Директори ҶДММ «Шириниҳои Тоҷикистон» Фирдавс Расулов ҳамчун роҳбалад ба ҷавонони тоҷику қирғиз оид ба таърихи ташкили муассиса маълумот дода, зикр кард, ки дар бозори шириниҳои кишвар тӯли 10 сол амал мекунанд. Баҳри пайдо намудани тасаввурот оид ба марҳилаҳои омодасозии маҳсулоти қаннодӣ иштирокчиёнро бо се ҳуҷра: утоқҳои хамирполоӣ, пухтупаз ва ороишӣ шинос намуд. Абдумаликов Боймат, сокини деҳаи Самарқандак мегӯяд:

-Ман дер боз дар андешаи ташкили сехи қаннодӣ дар наздики сарҳади ҳарду кишвар будам, лекин намедонистам, ки аз чӣ оғоз кунам. Имрӯз маслиҳатҳои масъулини «Шириниҳои Тоҷикистон» роҳи ояндаи тиҷоратамро муайян намуданд. Ман хушҳолам, ки лоиҳа баргузории чунин чорабиниҳоро сарфи назар накардааст. Аз ҷониби дигар, маҳз ба шарофати Барномаи рушди  СММ  ман  дӯстони  тоҷик пайдо  кардам.

Фариштамоҳ Сафарзода, сокини шаҳри Исфара, ки ҳар лаҳзаи саёҳатро тариқи телефони мобилиаш сабт мекард иброз дошт:

-Агар Боймат дар деҳааш сехи қаннодӣ кушояд, ман метавонам ба ӯ кадрҳои бомаҳорат омода намоям.

Ф.Сафарзода, омӯзгори МТМУ№24 буда, бизнес-нақшаи худро тартиб додааст. Мувофиқи он мехоҳад дар ошхонаи мактаб сехи қаннодӣ таъсис дода, дар назди он дарсҳои омӯзишӣ оид ба пухтупаз ташкил кунад ва ба ҳамин васила, шумораи ҳарчи бештари духтарони деҳаро ба зинаи саввуми таҳсил ҷалб намояд.

Дар доири «Бизнес стади тур» иштирокчиён аз боғи фарҳангӣ ва осорхонаи таърихии Камоли Хуҷандӣ дидан карда, сипас, дар маҷмааи 25-солагии Истиқлолияти Ҷумҳурии Тоҷикистон барои хотира акси умумӣ гирифтанд.

                                                                                                                                                           Фарзона Муродӣ

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube