Шакарханд аз Абдаруф Муродӣ

Таҷриба нишон дод, ки ошиқ шуда, ба маҳбуба не, ба хушдоман хушомад задан бештар бар манфиати кор аст.

***

Гули ҳамешабаҳор далели қотеъи он аст, ки бо як гул ҳаргиз баҳор намешавад.

***

Мунаққиде дар ҳошияи “Асп” ном ҳикояи басо сусти нависандае чунин навишт: «Ин “Асп”-и лаънатӣ бӯстони сабзу хуррами адабиётро хеле поймол кардааст».

***

Ошиқони пешин ба гардани маҳбубаашон нахуст шаддаи марворид мепечониданд, ошиқони имрӯза аввал даст мепечонанд.

***

Калҳо талаб карданд, ки мақоли “Корам аз мӯйи сарам зиёд” минбаъд чун дашноми қабеҳ дар гуфтор мамнуъ дониста, дар навишт бо се нуқта ишора шавад.

***

Оташи ҷаҳли шавҳар “хати никоҳ”-ро сӯхт.

***

Муаллими зистшиносӣ дар дарсе оид ба мавзӯи “Рӯбоҳ” шахси маккореро чун асбоби аёнӣ истифода бурд.

***

Хӯрокро аз ширу об таҳия карда бошанд ҳам, номашро широб не, ширчой ниҳоданд, маҳз ба хотири он ки сарвари коргоҳи гӯшту шир инро ба худ киноя пиндошта, наранҷад.

***

Шавҳаратонро эҳтиёт кунед: рӯзи 8-уми март даркор мешавад.

***

Мудири фермаи чорво ҳам одам аст, танҳо аз меъёр зиёд гӯшт мехурад.

***

Милисаю ронанда мисли мушу гурбаанд. Ҳеҷ ба ҳамдигар муросо надоранд.

***

Китобатон агар ба фурӯш наравад, арзон кунед, носфурӯш яклухт мехарад.

***

Қоматаш дар дифоъ аз ростӣ каҷ шуд.

***

Саратон дард кунад, назди духтури дандон наравед: канда мепартояд.

***

Мурдаи хасис ҳар куҷо ки хок шавад, он хок ҳосил намедиҳад.

***

Ба хари гандафеъламон полони олиҷаноб зада, ба фурӯш бурдем. Полонашро хариданду худашро не.

***

Лаклакро саркулол таъйин карданд, табақи паҳн аз байн рафт.

***

Барои пучуқ ҳамаи овозҳои нутқ димоғианд.

***

Арақи харидаи хасисе об баромад. Хурсанд шуд, ки акнун газакаш муфт мемонад.

Абдурауф МУРОДӢ

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube