Шикори «хлопушка» сар мешавад

Бо наздик шудани Соли нав мусодираи маводди тарфгарӣ (хлопушка) аз ҷониби мақомоти Тоҷикистон авҷ мегирад.

Вазорати дохила аз боздошти як донишҷи Донишкадаи тарбияи ҷисмонӣ ва як навраси 15-сола бо 1040 маводди тарфгарӣ хабар дод. Хадамоти гумрук гуфт, дар ноҳияи Бобоҷон Ғафуров аз як мошини БМВ 3578 адад «хлопушка” мусодира кардаанд.

Оғози парвандаи ҷиноятӣ барои воридоти маводи тарфгарӣ дар Суғд

Санаи 8-уми декабри соли ҷорӣ дар минтақаи наздисарҳадии Тоҷикистон-Қирғизистон, дар роҳи автомобилгарди самти «Конибодом-Хуҷанд», дар дидбонгоҳи БДА-и ҳудуди ҷамоати деҳоти Хистеварзи ноҳияи Бобоҷон Ғафуров, воситаи нақлиётии тамғаи «БМВ-520» рақами қайди давлатиаш 07 77 КВ 02, таҳти идораи шаҳрванди Ҷумҳурии Тоҷикистон Ю.Н., соли таваллудаш 1984 барои гузаронидани муоинаи гумрукӣ боздошт карда шуд.

Ҳангоми муоинаи гумрукӣ дар дохили бордони нақлиёти мазкур ба миқдори 7 қуттича (блок), ки дар дохилашон 10 адад қуттичаҳои майдаи маводи тарфгарии намуди «Трения», як қуттича дорои 12 дона маводи тарфгарии намуди «Красная нечисть», 8 қуттича дорои 10 дона, ҷамъ 80 дона маводи тарфгарии намуди Петарды «Чёрная смерт», 2 қуттича (блок), ки дар дохилашон 20 донагӣ, ҷамъ 40 дона маводи тарфгарии намуди «Цай Ван Лэй», 10 қуттича дорои 12 донагӣ, ҷамъ 120 дона маводи тарфгарии намуди «Маленькая пчёлка», 1 қуттича дорои 72 донагӣ, намуди фейерверк «Соловей разбойник», 2 бастаи селофани дорои 4 донагӣ, ҷамъ 8 дона оташфаввора «Золотой песок» ва 4 адад оташфавораи намуди «Двоедрагуна»-и маводи тарфгарии истеҳсоли Ҷумҳурии Қирғизистон дарёфт карда шуд, ки ба шаҳрванд Ю.Н., тааллуқ дошта, номбурда ин миқдор маводҳои тарфгариро аз деҳаи Арқаи Ҷумҳурии Қирғизистон ба қаламрави Ҷумҳурии Тоҷикистон бо роҳи ғайрирасмӣ бидуни назорати гумрукӣ ворид намудааст.

Тибқи хулосаи эксперти ташхиси судӣ- баллистикӣ ва тиру гилзадони ШТК РВКД ҶТ дар вилояти Суғд аз 8-уми декабри соли 2017 маводҳои аз шаҳрванд Ю.Н., гирифташуда, маводҳои силиндршакл буда, миқдори умумии маводи мазкур 3578 ададро ташкил дода, ба гурӯҳи маводҳои тарфгарӣ, яъне перотехникӣ (хлопушка) дохил аст. Аз инҳо: — 24 адад «хлопушка Фейервсрк дводрагуна», «Золотой песок» (хлопушка) ва «Красная нечисть ракета» ба гурӯҳи маводҳои тарфгарӣ, яъне перотехникии фаввораи мушакҳо (салют) дохил мешаванд, 152 адад маводҳои тарфгарии навъи мушаки коғазини дастӣ (хлопушка-петарда) ва «Петарды черная смерт» ба гурӯҳи маводҳои тарфгарии навъи мушаки коғазини дастӣ (хлопушка-петарда) дохил буда, 148 адад маводи тарфгарии намуди «ЦАЙ ВАН ЛЭЙ» ва «Маленькая пчёлка» ба маводҳои тарфгарӣ, яъне перотехникӣ (хлопушка) дохил буда, ҳамаи онҳо барои истифодабарии аз рӯи таъиноташон дар ҳолати коршоямӣ қарор доранд.

Аз рӯи ҳолати мазкур нисбат ба шаҳрванд Ю.Н. бо моддаи 199 пр-1 қисми 2-и Кодекси ҷиноятии Ҷумҳурии Тоҷикистон, парвандаи ҷиноятӣ оғоз карда шуда, аз рӯи тобеияти тафтишотӣ ба прокуратураи вилояти Суғд фиристонида шуд.

Маркази матбуоти Хадамоти гумруки Тоҷикистон

Зимни гузаронидани чорабиниҳои оперативӣ-ҷустуҷӯӣ аз ҷониби кормандони милитсия дар ҳудуди ноҳияи Фирдавсӣ ҷавонписари 20-сола, донишҷӯи Донишгоҳи тарбияи ҷисмонии Тоҷикистон ва ноболиғ, писабачаи 15-сола, хонандаи синфи 9-уми яке аз муассисаҳои таҳсилоти миёнаи умумии пойтахт бо гумони муомилоти ғайриқонунии маводи тарфгарӣ дастгир карда шуданд.

Дар вақти кофтукови шахсӣ аз онҳо 1040-адад маводи тарфгарии намуди «Хлопушка”, дарёфт ва мусодира карда шуд.
Аз рӯи ин ҳодиса парвандаи ҷиноятӣ оғоз гардида, тафтишот идома дорад.

Маркази матбуоти ВКД Тоҷикистон