Таассуфи Раҳмон аз ваъдахилофии «Толибон»

Сарвари давлат бо таассуф гуфт, ки «Толибон»* ваъдаи таъсиси ҳукумати фарогирро дар Афғонистон иҷро накарданд

Тоҷикони этникӣ, ки дар Афғонистон ба сар мебаранд, ҳақ доранд дар идораи давлатии ҷумҳурӣ ҷои муносибро ишғол кунанд.

Дар ин бора президенти Тоҷикистон Эмомалӣ Раҳмон дар паёми видеоии худ ба ширкаткунандагони иҷлосияи 76 -уми Маҷмаи Умумии СММ гуфтааст.

«Тоҷикони Афғонистон, ки беш аз 46 дарсади аҳолии онро ташкил медиҳанд, дар қатори дигар қавмҳои ин кишвар ҳақ доранд, ки дар ҳукумат мақоми сазоворро ишғол кунанд», — гуфт ӯ.

Ба гуфтаи Раҳмон, ба сари қудрат омадани аъзои «Толибон»* раванди бе ин ҳам мушкил геополитикии кишварро боз ҳам печидатар кардааст.

Сарвари давлат изҳори таассуф кард, ки «Толибон»* ваъдаи худро иҷро накарданд ва дар ҷумҳурӣ ҳукумати фарогирро ташкил накарданд.

Ба гуфтаи Раҳмон, танҳо муколама бо ширкати тамоми табақаҳои ҷомеаи Афғонистон, аз ҷумла тоҷикон, боиси истиқрори сулҳу суботи пойдор дар минтақа хоҳад шуд.

Сарвари давлат таъкид кард, ки Тоҷикистон ба умури дохилии Афғонистон дахолат нахоҳад кард, вале барои ҳалли муносиби мушкилоти сиёсиву амниятии кишвари ҳамсоя бояд ҳукумати ҳамашумул ташкил карда шавад.

Вай пешниҳод кард, ки «тариқи раъйпурсӣ ва бо назардошти мавқеи ҳамаи шаҳрвандони кишвар сохтори қудрат муайян карда шавад» ва бори дигар ба ташкили ҳукумати фарогир даъват кард.

Илова бар ин, Раҳмон ҷиноятҳо, кушторҳо, ғоратгарӣ ва зулми мардуми Афғонистонро маҳкум кард ва аз вазъи бад дар Панҷшер сухан гуфт. Ба гуфтаи президенти Тоҷикистон, дар ин вилоят фоҷиаи инсонӣ рух медиҳад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube