ТВ Бадахшон суҳбати Аловатшоевро рӯи навор овард…

Телевизиони давлатии «Бадахшон» навори суҳбати Амриддин Аловатшоев, яке аз чеҳраҳои бонуфуз дар минтақаро нашр кард. Ӯ ҳоло дар боздошт аст.

Ба қавли пайвандонаш, Аловатшоевро 11-уми январи имсол дар Белгород дастгир карда, сипас ба Тоҷикистон овардаанд. Додситонии кулли Тоҷикистон рӯзи 2-юми феврал гуфт, ки «ӯ истирдод шуд». Вазорати корҳои дохилӣ иддао кард, ки «бо хоҳиши худ баргашт».

Амриддин Аловатшоев ба «гаравгонгирӣ, аз озодӣ маҳрум кардан ва амалҳои дигари ҷиноятҳои хусусияти муташаккилона дошта» муттаҳам аст. Чизе, ки наздикону тарафдоронаш беасос медонанд.

Дар наворе, ки 12-уми феврал нашр шуд, Аловатшоев, ки зоҳиран зери назари мақомот суҳбат мекунад, мегӯяд, зери шиканҷа қарор надорад ва худаш ихтиёрӣ ба ватан баргашт.

Ҷонибдоронаш бар инанд, ки назари ӯ зери фишори мақомот сабт шудааст ва ба ҳарфҳояш набояд бовар кард. Вай дар навор мегӯяд, “аз кардаам сахт пушаймонам, ҳазорон маротиба тавба кардаам ва дигар ба ҷиноят даст намезанам.”

Пахши ин навор дар шабакаҳои иҷтимоӣ мавриди танқид қарор гирифт. Мухолифин ин наворро идомаи эътирофҳои дуруғине номиданд, ки зери фишори мақомот дар боздошт сабт мешаванд ва мавриди эътимод нестанд.

Мақомот пас аз нашри хабарҳо дар бораи шиканҷа шудани Амриддин Аловатшоев навори суҳбати наздикон ва адвокаташро нашр карданд, ки иддао доштанд, “ӯ сиҳату саломат аст.” Дар навори пахшшуда Аловатшоев риш надорад, ҳол он ки дар ҳамаи аксҳои пешинааш бо риши кутоҳе намудор мешуд.

Дидбони ҳуқуқи башар ва Эътилофи созмонҳои ҷамъиятии зидди шиканҷа ва Ҳамкории байналмилалӣ барои ҳуқуқи инсон (IPHR) боздошти ӯро маҳкум карда буданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube