Ҳукумати Ӯзбекистон ба соҳибкори турк 40 миллион доллар ҷуброн мепардозад

Додгоҳи ҳакамии байналмилалӣ ҳукумати Ӯзбекистонро вазифадор кард, ки ба ширкати туркии «Gunes Tekstil Konfeksiyon Sanayi ve Ticaret Ltd» $40 миллион ҷуброн пардозад. Дар ин бора нашрияи «Global Arbitration Review» (GAR) иттилоъ дод.

Шаҳрванди 50-солаи Туркия Воҳид Гюнеш, ки солҳои 2004-2011 дар шаҳри Тошканд фурӯшгоҳи «Turkuaz»-ро таъсис дода буд, ҳукумати Ӯзбекистонро ба додгоҳи ҳакамии байналмилалӣ кашида, талаб кард, дороии мусодирашуда дар моҳи апрели соли 2012 баргардонида шавад.

Маркази байналмилалии ҳалли баҳсҳои сармоягузорӣ, ки мақараш дар ИМА аст, (ICSID) шикояти соҳибкори туркро 7 сол баррасӣ ва ниҳоят 4 октябри соли равон қарор кард, ки ҳукумати Ӯзбекистон бояд дар ҳаҷми 40 миллион доллар ҷуброн пардозад.

Бино ба маводи парванда, ширкати туркии Gunes Tekstil Konfeksiyon Sanayi ve Ticaret Ltd бо айби ҳукумати Ӯзбекистон 180 миллион доллар хисорот дидааст. Тошканди расмӣ то ҳол ин қарори ICSID-ро шарҳ надодааст.

Ёдрас мешавем, Воҳид Гюнеш пас аз 7 соли фаъолият дар Ӯзбекистон боздошт ва 9 моҳ дар ҳабс нигаҳ дошта шуд. Додгоҳи Ӯзбекистон ӯ ва ҳафт соҳибкори дигарро дар саркашӣ аз пардохти андоз ва «мусоидат ба иқтисоди соягӣ» айбдор кард. Фурӯшгоҳи «Turkuaz» баста шуд.

Айби соҳибкорон пас аз пардохти 700 ҳазор доллар ба мақомоти Ӯзбекистон сабук ва аз кишвар ихроҷ карда шуданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube