“Узбекистон ҳаво йӯллари”: Бо айби “Сомон Эйр” парвоз амалӣ нашуд

Масъулони ширкати ҳавоии “Узбекистон ҳаво йӯллари” дар робита ба таъхири парвози рӯзи гузашта аз Душанбе ба Тошканд гуфтанд, ки ширкати ҳавоии “Сомон Эйр”-и Тоҷикистон муқаррароти байналмилалӣ дар мавриди пешниҳоди санади расмӣ дар мавриди тартиби парвозҳоро, иҷро намекунад.

Дар баёнияи “Узбекистон ҳаво йӯллари”, ки шоми 23 феврал дар торнамои расмии ин ширкат мунташир шудааст, гуфта мешавад, ки бар асоси Муқаррароти Ҷумҳурии Узбекистон “Дар бораи анҷоми парвозҳои муназзам дар Ҷумҳурии Узбекистон тавассути ширкатҳои хориҷӣ”, ки дар 25 феврали соли 2008 тасвиб шудааст, ширкати хориҷӣ бояд то 30 рӯз қабл аз оғози парвозҳо, бастаи санадҳои расмиро ба ҷониби Узбекистон пешниҳод кунад.Қаблан масъулони ширкати “Узбекистон ҳаво йӯллари” зимни шарҳи иллатҳои анҷом нашудани парвози нахустини расмӣ миёни Душанбе ва Тошканд дар рӯзи 20 феврал гуфта буданд, ки ширкати “Сомон Эйр” бастаи санадҳои расмиро бояд дар 3 рӯзи корӣ қабл аз шурӯи парвозҳо ба ҷониби Узбекистон ирсол мекард.Дар баёнияи нави ширкати ҳавоии Узбекистон омадааст: “Дар ҷараёни мулоқоти мақомоти ширкатҳои “Узбекистон ҳаво йӯллари” ва “Сомон Эйр” дар рӯзи 10 феврал ширкати ҳавоии Тоҷикистон банди санадҳои расмиро барои парвози муназзам миёни Душанбе ва Тошканд пешниҳод кард ва ҳоло ин аснод дар марҳилаи омӯзиш қарор дорад.”Ин манбаъ мегӯяд, рӯзи 23 феврал дар дафтари ширкати ҳавоии “Узбекистон ҳаво йӯллари” дар шаҳри Тошканд дидори намояндаи ширкати “Сомон Эйр” Бахтиёр Алимуродов бо мақомоти ин ширкат дар иртибот ба анҷом нашудани парвоз миёни Душанбе ва Тошканд баргузор шуд ва ҷониби Узбекистон дар ин замина муқаррароти анҷоми парвозҳои ширкатҳои хориҷиро дар ин кишвар муфассал шарҳ додааст.То ҳол масъулони Вазорати нақлиёти Тоҷикистон ва ширкати ҳавоии «Сомон Эйр» дар мавриди сабаби анҷом нашудани парвози ҳавоипаймои ин ширкат аз Душанбе ба Тошканд дар рӯзи 23 феврал ибрози назаре накардаанд. Парвози ҳавопаймои ширкати “Сомон Эйр” аз Душанбе ба Тошканд рӯзи 23 феврал бояд анҷом мешуд, вале он сурат нагирифт. Субҳи он рӯз масъулини ширкат ва фурудгоҳи Душанбе дар бораи омодагиҳо ба парвоз дар соати 13:00 рӯз хабар доданд, вале дар ниҳоят ин парвоз анҷом нашуд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube