Ваъдаи Валентина Казакова ба муҳоҷирон дар Русия

Русия талош дорад, ки  тартиби пешниҳод ва бақайдгирии муҳоҷирони меҳнатиро дар Русия осон кунад.

Ин нуктаро Валентина Казакова, сардори Сарраёсати муҳоҷирати Вазорати корҳои дохилии Русия 21-уми апрел  дар шаҳри Душанбе гуфт.

“Мо дар якҷоягӣ бо мақомотҳои дахлдори Тоҷикистон кушиш дорем, ҳузури муҳоҷирони меҳнатии Тоҷикистон дар Русия роҳаттар бошад ва сабти иқомату барасмиятдарории онҳо низ осонтар шавад. Дар ояндаи наздик мо якчанд иқдом ҳам дар ин маврид анҷом хоҳем дод”, — гуфт Казакова.

 Ҳамчунин, Валентина Казакова дар бораи беш аз 200 ҳазор муҳоҷирони тоҷике, ки ҳоло дар қаламрави Русия ғайриқонунӣ ҳузур доранд гуфт, ки онҳо то 30 июн метавонанд ҳузури худро дар қаламрави Русия қонунӣ гардонанд ва санадҳои худро дар Русия тамдид намоянд.

“Дар давоми соли гузашта, ба муҳоҷирон барои қонунӣ намудни вазъи худ дар Русия кифоя буд, аммо ҳоло ҳам то 30 июн фурсат вуҷуд дорад. Ман бори дигар хоҳиш мекунам, ки муҳоҷирони тоҷик аз ин фурсат истифода намоянд ва ба мақомоти муҳоҷиат омада худро сабти ном кунанд ва барои фаъолият дар қаламрави Русия иҷозатнома бигиранд”, — зикр кард хонум Казакова.

Сардори Сарраёсати муҳоҷирати Вазорати корҳои дохилии Русия илова кард, ки дар оянда раванди сабти иқомат ва гирифтани иҷозатномаҳо барои кор дар қаламрави Русия содатар хоҳад шуд.

“Гузариш ба портали ягонаи хизматрасониҳои давлатӣ (Госуслуги) ба роҳ монда мешавад. Ҳамаи ҳуҷҷатҳоро метавон дар шакли электронӣ пешниҳод кард. Дар оянда ҳамаи мушкилоте, ки имрӯз дар пеш истодаанд, ҳалли худро пайдо хоҳанд кард”,- афзуд Валентина Казакова.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube