Ёвон. Ҷамъоварии пахта шурӯъ шуд

    Дар ноҳияи Ёвон ба ҷамъоварии пахта шуруъ карданд. Масъулин аз рӯзи аввали чиниши пахта паҳлӯи марди деҳқон қарор гирифта,  талош доранд, ки ҳосилро сари вақт ва беталаф ҷамъоварӣ намоянд.

 Дар рӯзи оғози ин маъракаи муҳим Бахтиёр Шарифӣ, раиси ноҳияи Ёвон чун дигар сокинон дар ҷамъоварии тиллои сафед саҳм гузошт. Ӯ дар ин рӯз ба ҷамъоварии пахта дар ноҳияи Ёвон оғоз бахшида, аз чанд хоҷагиҳои пахтакор дидан кардааст.

 Аз мақомоти маҳаллӣ ба Pressa.tj гуфтанд, ки бо истифода аз ҳама шароиту имконият такя бо сокинон ва кишоварзони соҳибтаҷрибаи ноҳияи Ёвон нақшаи пахтасупориро дар мавсими ҷорӣ саривақт иҷро мекунем. 

Зеро пахта яке аз маҳсулоте аст, ки талабот ба он хеле зиёд аст. Хушбахтона, бо дастгирии ҳукумати кишвар имрӯз пахта дар мамлакат пурра коркард мешавад. Феълан дар сортосари кишвар ба ин хотир  садҳо корхонаи коркарди пахта фаъолият дорад.

Ёдовар мешавем, ки ноҳияи Ёвон соли гузашта дар моҳи ноябр аз иҷрои пурраи нақшаи ҷамъоварии пахта хабар дода буд. Соли 2023 хоҷагиҳои пахтакор дар майдони 10 ҳазору 162 гектар пахта кишт карда буданд. Хоҷагидорон бештар аз 23 ҳазор 822 тонна пахта ҷамъовари карданд, ки баробар ба 100 дарсади нақша аст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube