Зарари тарма: Даҳ мусофир ҷароҳат бардоштаанд

Як мошинро бо даҳ мусофир ва ронандааш тарма дар километри 8-уми роҳи мошингарди Хоруғ — Роштқалъа ба умқи панҷметраи соҳили рӯди Шоҳдара партоб кардааст.

Хушбахтона, дар ин ҳодиса талафоти ҷонӣ набудааст, вале ҳамаи мусофирон ҷароҳат бардоштаву ба бемористон интиқол дода шудаанд.

Бино ба иттилои Кумитаи ҳолатҳои фавқулода ва мудофиаи граждании кишвар, ин ҳодиса дирӯз, 14-уми феврал дар қаламрави деҳаи Шодии ҷамоати деҳоти Гадоалиеви ноҳияи Роштқалъа рух додааст. Мошини “Toyota-микроавтобус” аз ҷониби як сокини 36-солаи деҳаи Риҷести ҷамоати деҳоти Тусёни ноҳияи Роштқалъа идора шуда, аз шумори 10-нафараи мусофиронаш ду нафар занон будаанд.  Ин мошин аз шаҳри Хоруғ берун шудаву ба самти Тусён дар ҳоли ҳаракат будааст.

Наҷотдиҳандагони Раёсати КҲФ дар ВМКБ ва дастаи имдодгарони ихтиёрии Хазинаи Оғохон оид ба зистгоҳ ба зудӣ ба ҷойи ҳодиса расидаанд ва маълум шудааст, ки ҳамаи мусофирон зиндаву саломатанд, вале ҳамагӣ ҷароҳатҳои гуногун бардоштаанд. Онҳоро ба зудӣ ба беморхона интиқол додаанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube