Қазияи сӯиқасд ба ҷони декан. Ректор чӣ посух гуфт?

Илҳом Амонзода, ректори Донишгоҳи технологии Тоҷикистон қазияи корд задани устоди ин донишгоҳ аз ҷониби донишҷӯро шарҳ дод.

Ӯ зимни нишасти матбуотӣ, ки имрӯз, 5-уми феврал доир шуд, ба саволи журналистон чунин ҷавоб гуфт: ”Донишҷӯе, ки ин амалро анҷом дод, дар донишгоҳ бо баҳои миёна мехонд. Ҳоло вазъи саломатии декани факултети донишгоҳ Музаффар Имомназаров мӯътадил аст. Раёсат ва устодони донишгоҳ пайваста аз ҳоли ӯ хабар мегиранд”.

Аммо ректори донишгоҳ ба хотири халал нарасондан ба раванди тафтишот аз шарҳи бештари ҳодисаи сӯиқасд ба ҷони декани факултет Имомназаров аз тарафи донишҷӯ Айниддин Давлятов худдорӣ кард.

“Ҳоло аз тарафи мақомоти ҳифзи ҳуқуқ тафтишот идома дорад. Шумо метавонед саволро ба онҳо диҳед”,-кутоҳ посух гуфт ректор.

Ёдрас мешавем, ки кормандони милитсияи пойтахт Давлятов Айниддин Нуриддинович, донишҷӯи бахши дуюми Донишгоҳи технологии Тоҷикистонро бо ҷурми сӯиқасд ба одамкушӣ дастгир кардаанд. Номбурда 28-уми январи соли 2021, тахминан соати 16:30-дақиқа, декани факултети менеҷменти байналмилалии донишгоҳи номбурда Имомназаров Музафар Аҳмадҷонович, соли таваллудаш 1978, сокини шаҳри Душанберо дар назди утоқи кориаш воқеъ дар донишгоҳи мазкур бо корд 1 маротиба ба шикамаш задааст.
“Дар натиҷа, омӯзгор ҷароҳати вазнини ҷисмонӣ бардошта, дар беморхона бистарӣ карда шудааст”,- иттилоъ медиҳад маркази матбуоти РВКД дар шаҳри Душанбе.

Тибқи иттилои манбаъ, санҷиш ва тафтиши раванди таҳсилоти гумонбаршаванда Давлятов Айниддин дар донишгоҳи мазкур муайян намуд, номбурда ба таври доимӣ ба дарсҳо ҳозир нагардида, дар баробари ин нисбати устодон беэҳтиромӣ зоҳир намуда, аз имтиҳонҳо низ қарздор будааст.

“Декани факултети мазкур ба хотири фаҳмидани мушкилоти донишҷӯ падари гумонбаршуда шаҳрванд Давлятов Нуриддинро ба донишгоҳ даъват намуда, аз раванди таҳсилот, одобу ахлоқ ва мушкилоти фарзандаш ӯро огоҳ намудааст.

Дастгиршуда Давлятов Айниддин аз он ки падараш аз нахондану қарздории ӯ аз имтиҳонҳо тавассути декани факултет огоҳ шуда, ӯро сарзаниш кардааст нақшаи аз ҳаёт маҳрум сохтани деканро тарҳрезӣ намудааст. Бо ин мақсад, санаи 28-уми январи соли ҷорӣ бо корд мусаллаҳ гашта, декани факултети худро дар назди утоқи кориаш бо корд захмӣ карда, аз ҷойи ҳодиса фирор мекунад”,-меафзояд манбаъ.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube