“Арсенал” ғолиби Суперҷоми Англия-2023 шуд

Бошгоҳи “Арсенал”-и шаҳри Лондон дар бозии Суперҷоми Англия муқобили “Манчестер Сити” зафар ёфта, пас аз 6 сол дигарбора барандаи ин ҷом гардид.

Бино ба иттилои ТВ “Варзиш”, вақти асосии бозӣ, ки дар варзишгоҳи «Уэмбли»-и Лондон баргузор шуд, бо ҳисоби 1:1 анҷом ёфт. Голҳоро аз ҳайати “шаҳриҳо” дар дақиқаи 77-ум Коул Палмер ба ҳадаф расонид. Голи Леандро Троссард “тӯпчиён”-ро дар дақиқаи 90+11 аз мағлубият наҷот дод. Дар зарбаҳои пеналтӣ бошгоҳи шаҳри Лондон пурқувваттар баромад — 4:1.

Ёдовар мешавем, ки “Арсенал” барои 17-умин бор дар таърихи худ ин ҷомро ба даст овард. Бошгоҳи “Манчестер Юнайтед” 21 маротиба соҳиби ин ҷом гардидааст. “Манчестер Сити” шаш маротиба Суперҷоми Англияро ба даст овардааст.

Дар мавсими гузашта шогирдони Хосеп Гвардиола треблро анҷом дода, дар ПЛА, Ҷоми Англия ва инчунин Лигаи Чемпионҳо ғолиб шуда буданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube