Аз таҳти дил бихандед!

Нигоҳи пулчинак

Зане ба хонааш ғамгин меояд. Шавҳараш аз ӯ мепурсад:

— Ҳа, занак, чаро ғамгин ҳастӣ?

Зан мегӯяд:

— Имрӯз дар мусофирбар пулчинак тавре ба ман нигоҳ кард, ки гӯё ман роҳкироро надода бошам.

Шавҳар:

— Баъд ту чӣ кор кардӣ?

Зан:

— Ман ҳам тавре ба ӯ нигаристам, ки гӯё роҳпулиро дода бошам.

Таваккал

Муаллим ба донишҷӯе, ки ба ягон савол ҷавоб дода наметавонад, мегӯяд:

— Гӯш кун, се маротиба аст, ки туро аз санҷиш мегардонам. Барои чӣ намеомӯзӣ? Аз савод омӯхтан то ҳол касе намурдааст!

— Ман медонам муаллим, аммо таваккал кардан чӣ лозим?

Дуроҳа

Нозири БДА бандагиро ба ҷо меорад. Дар гӯр барои ба дӯзах ё биҳишт равон карданаш фариштаҳои дасти чапу рост баҳс мекунанд.

— Ӯ одами бад буд, ҳама умр пора мегирифт, арақ мехӯрд… ба дӯзах!, -мегӯяд фариштаи дасти чап.

— Не, ӯ одами нағз буд. Одамонро аз хатар раҳо мекард, ба ҳама ёрӣ медод… ба биҳишт!,- мегӯяд фариштаи дасти рост.

Ин дам худи нозир мегӯяд:

— Бачаҳо, шумо баҳс накунед… маро дар дуроҳа гузоред!

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube