Аз таҳти дил бихандед!

Имтиҳон

Ашӯр Сафар солҳои зиёд муаллими мактаби миёна буд. Дар имтиҳони хатмкунӣ толибае ба ягон суоли билет ҷавоб намедиҳад, вале дили муаллим намешавад, ки ба ӯ баҳои ғайриқаноатбахш монад. Аз ин рӯ, чандин суоли иловагӣ медиҳад, то ки толиба ақаллан даҳон кушояду ягон баҳои «3» гирад.

— «Одина»-ро хондай?

— …

— «Дохунда»-ро чӣ?

— …

«Ҷони ширин»-ро ҳам нахондай?

— …

— Умуман ягон китоб хондай дар умрат?

— Ҳа-а,- ниҳоят лаб мекушояд толиба.

— Э, хайрият-е. Ку, бигӯ, кадом китобҳоро хондаӣ?

— «Хандаи гулҳо»-и Ашӯр Сафар, «Фарзанди аср»-и Ашӯр Сафар, «Базми садоқат»-и Ашӯр Сафар, «Гули маҳтоб»-и Ашӯр Сафарро.

— Ҳа-а,- посухи толибаро то охир гӯш дода, мегӯяд Ашӯр Сафар.- Ҳаминҳоро хондай, ки балора намедонӣ.

Шавҳаркуш

Дар толори суд аз зани шавҳаркуш мепурсанд:

— Чор шавҳари шумо аз истеъмоли хочи заҳрнок фавтиданд, панҷумаш бошад, аз зинаҳо сарозер шуд. Шумо ин фоҷиаро чӣ гуна шарҳ медиҳед?

Зан дар посух мегӯяд:

— Шавҳари панҷумам хочро намехӯрд.

Фолбин

Духтаре ба ҷавони дӯстдоштааш мегӯяд:

— Субҳон, кай ба хонаамон хостгор равон мекунӣ?

Ҷавон дар ҷавоб:

— Медонӣ, ҷонакам, як фолбин ба ман гуфт, ки зани якумам вафот мекунад. Беҳтараш ман сараввал бо духтаре издивоҷ мекунам, ки дилам барои мурданаш насӯзад, ана баъд туро ба занӣ мегирам.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube