Боришоти зиёд ва баландшавии сатҳи оби дарёҳо пешбинӣ шудааст

 Агентии обуҳавошиносӣ ҳушдор медиҳад, ки дар робита ба ноустувор шудани вазъи обу ҳавои мамлакат рӯзҳои наздик боришоти зиёди борон ва дар баландиҳои 2000 метр боридани барф дар назар аст. Дар ноҳияҳои тобеи марказ эҳтимоли ба амал омадани раъду барқ пешгӯӣ мешавад.

Чуноне аз Агенти хабар доданд, имрӯз, 27 феврал дар натиҷаи боришоти зиёде, ки ба дарёҳои қаторкӯҳи Ҳисор, инчунин дарёҳои Ёхсу, Қизилсӯ ҷорӣ мешаванд, баландшавии якбораи сатҳи об дар назар аст.

Дар робита ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба шаҳрвандон ва меҳмонон муроҷиат карда, хоҳиш менамояд, ки дар ноҳияҳои мазкур ва  вилоятҳои Суғду Хатлон хеле эҳтиёткор бошанд.

Сухангӯи Кумита Умеда Юсуфӣ баён доштааст,ки ҳангоми ҳаракат дар шоҳроҳҳо, махсусан дар ағбаҳо пеш аз сафар сокинонро зарур аст, ки воситаҳои нақлиёти худро бори дигар санҷанд. «Ғайр аз ин аз шаҳрвандоне, ки дар ноҳияҳои кӯҳӣ зиндагӣ мекунанд,  Кумита муроҷиат карда, хоҳиш менамояд, ки аз ҷамъоварии ҳезумҳо ва баромадан ба шикор худдорӣ намоянд. Инчунин аз шаҳрвандон хоҳиш менамоем, ки дар 3 рӯзи охир аз моҳидорӣ дар дарёҳои мазкур худдорӣ намоянд»,-гуфтааст Умеда Юсуфӣ.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube