Дар “Шифобахш” боз як амалиёти мураккаби ҷарроҳӣ гузаронида шуд

Табибони Маркази миллии тиббии Тоҷикистон “Шифобахш” дар ҳамкорӣ бо мутахассисони Маркази ташхисию табобатии “Дастаи Дил” дар самти бемориҳои рагҳои мағзи сар боз ба як навгонӣ шарафёб гаштанд.

Бино ба иттилои вазорати тандурустӣ ва ҳифзи иҷтимоии аҳолии Тоҷикистон, аз ҷониби табибони ин марказ ба як бемори 16-сола, сокини ноҳияи Мир Сайид Алии Ҳамадонӣ, ки косахона ва майнаи сари ӯ ҳангоми афтодан осеби ҷиддӣ дида буд, ба тариқи эндоскопӣ, яъне бе буриш амалиёти ҷарроҳӣ гузаронида шуда, нуқсонҳои ҷойдоштаи бемор бартараф карда шуданд.

Субҳониддин Баҳодуров, табиби ҷарроҳи бемориҳои мағзи сари Маркази миллии тиббии Тоҷикистон “Шифобахш” якҷо бо ҳамкорони хеш амалиёти ҷарроҳии мазкурро гузаронидааст. Ӯ мегӯяд,  ташхис нишон дод, ки раги калони майнаи сари бемор ҳангоми дохил шудан ба косахонаи сар сурох  ва бо рагҳои варидӣ пайваст шудааст. Дар натиҷа дар бемор нобиноӣ, варам ва сурхии чашм ва рафтани хунравиҳои шадид аз бинӣ ва даҳон ба вуҷуд омадааст.

“Муайян гардид, ки ин беморӣ ҳангоми осебҳои косахона ва майнаи сар, махсусан шикастани устухонҳои асосии косахонаи сар ба миён омада, дар натиҷа шикоятҳои мазкур дар бемор ба вуҷуд омадаанд”,-иттилоъ медиҳад вазорати тандурустӣ.

Ба гуфти табиби ҷарроҳи бемориҳои мағзи сар Субҳониддин Баҳодуров, чунин ҷарроҳӣ яке аз ҷарроҳиҳои мушкил ва мураккаби рагҳои калони мағзи сар ба ҳисоб меравад.

“Ин гуна ҷарроҳӣ то кунун дар кишвар гузаронида намешуд ва беморон ё ба кишварҳои хориҷӣ сафар мекарданд ва ё барои гузаронидани чунин ҷарроҳиҳо мутахассисон аз хориҷи мамлакат даъват карда мешуданд”-гуфт номбурда.

Айни ҳол вазъи саломатии бемор хуб буда,  шикоятҳое, ки то баргузории ҷарроҳӣ дар он ҷой доштанд, пурра бартараф гардидааст.

Гуфта мешавад, ки Субҳониддин Баҳодуров, табиби ҷарроҳи бемориҳои мағзи сари Маркази миллии тиббии Тоҷикистон “Шифобахш”, ки амалиёти ҷарроҳии мазкурро бо ҳамкорони хуш гузаронид, дар самти омӯхтани ҷарроҳиҳо дар риштаи мағзи сар давоми якуним сол дар  Эрон аз такмили ихтисос гузаштааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube