Дастаҳои даври нимфинал маълум шуданд

Рўзҳои истироҳати гузашта бозиҳои даври чорякфинали Ҷоми футболи Тоҷикистон-2022 баргузор ва дастаҳое, ки дар нимфинал ширкат мекунанд, маълум шуданд.

Рўзи 27-уми август дастаҳои “Файзканд”-и Восеъ ва “Куктош”-и Рўдакӣ дар майдони “Нефтяник”-и ноҳияи Рўдакӣ бозӣ карданд. Бозигари “Файзканд” Обама Арсен дар дақиқаи 9-ум ҳисобро кушод. Дар дақиқаи 34-ум футболбози мизбон Худойдод Узоқов ҳисоби бозиро баробар кард. Ҳамин бозигар дар нимаи дуюми бозӣ, дар дақиқаи 87-ум боз як гол зада, ғалабаи дастаашро таъмин кард.

Рўзи 28-уми август се бозии дигар доир шуд. “Эсхата”-и Хуҷанд бар дастаи КМВА аз Душанеб бо ҳисоби 1:0 пирўз шуд. Дастаҳо дар майдони “Спартак”-и шаҳри Хуҷанд вохўрданд. Голи ягонаро Санҷар Рихсибоев дар аввали нимаи дуюми бозӣ зад. “Саройкамар”-и Панҷ дар бозии хонагӣ аз “Хатлон”-и Бохтар шикаст хўрд — 0:1. Голро Тоҳирҷон Тағойзода дар дақиқаи 80-ум зад. Дар бозии охирини даври чорякфинал “Истиқлол”-и Душанбе бар дастаи “Равшан”-и Кўлоб ғалаба кард — 1:0. Голро дар дақиқаи 15-ум Манучеҳр Ҷалилов ба ҳадаф расонд.

Ҳамин тавр, дар нимфинали Ҷоми Тоҷикистон-2022 “Истиқлол” бо “Эсхата” ва “Хатлон” бо “Куктош” бозӣ мекунанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube