Ду медали тиллои олимпичиёни тоҷик аз бозиҳои Берлин

Сафири Тоҷикистон дар Олмон Имомуддин Сатторов бо ҳайати варзишгарони тоҷик — иштирокунандагони Бозиҳои махсуси ҷаҳонии тобистонаи олимпии Берлин 2023 (Special Olympics World Summer Games 2023) мулоқот намуд.

Бино ба иттилои Сафорати Тоҷикистон дар Берлин, дар сафорат бо варзишгарони тоҷик Абдулҳамид Эмомов ва Нисора Сафарова, ки дар сабқатҳо — давидан ба масофаи 200 метр ва тенниси рӯйи миз мақоми аввалро касб карда, бо медали тилло сарафроз гаштанд, гуфтугӯи судманд доир шудааст.

Аснои суҳбат таваҷҷуҳ ва ғамхории доимии Пешвои миллат, Президенти Ҷумҳурии Тоҷикистон Эмомалӣ Раҳмон нисбат ба варзишгарон, рушди соҳаҳои мухталифи варзиш, оммавигардонии он ва тарғиби тарзи ҳаёти солим миёни аҳолӣ таъкид гардидааст.

Сафир варзишгарон ва мураббиёнро бо дастоварди назаррас ва ҳамчунин Рӯзи байналмилалии олимпӣ, ки ҳамасола 23-юми июн дар саросари ҷаҳон таҷлил мегардад, табрик намуда, ба онҳо музаффариятҳои нав ба нав ва комёбиҳои бузурги варзиширо таманно кардааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube