Муратхон Токмадӣ гуфт куштори Ержан Татишев кори дасти ӯст
Тоҷир ва молики корхонаи бузурги «Казстройстекло»-и Қазоқистон Муратхон Токмадӣ, ки бо ҷурми «тамаъҷӯӣ» маҳкум ба зиндон шуд, иқрор кард, дар куштори раҳбари пешини «Бонки ТуранАлем» (БТА) Ержан Татишев ӯ низ айбдор аст.
Токмадӣ дар додгоҳи шаҳри Тарази Қазоқистон баъд аз қироат шудани айбнома дар посух ба суоли додрас гуфт, худро дар куштори раҳбарияти бонк айбдор медонад.
Телевизиони давлатии Қазоқистон моҳи октябри соли гузашта гузоришеро нишон дод, ки дар он Токмадӣ мегӯяд, куштори раҳбари пешини «Бонки ТуранАлем»-ро дар соли 2004 Мухтор Аблязов «фармоиш» додааст. Аблязов баъд аз марги Татишев раҳбари бонк тайин шуд. Додгоҳи Қазоқистон моҳи июни соли 2017 ӯро бо ҷурми дуздидани пулҳои бонки мазкур дар ғайбаш 20 сол аз озодӣ маҳрум кард.
Муратхон Токмадии 52-сола 12 июни соли 2017 дар шаҳри Алмато дар натиҷаи як амалиёти махсуси мақомоти қудратӣ боздошт шуда, моҳи октябри ҳамон сол бо ҷурми тамаъҷӯӣ ва ғайриқонунӣ нигаҳ доштани силоҳ се сол аз озодӣ маҳрум шуд. Наздикон ва ҷонибдорони Токмадӣ тамоми айбҳоро сохта меноманд.
Ержан Татишев моҳи декабри соли 2004 дар вилояти Ҷамбули Қазоқистон кушта шуд. Мақомоти қазоқ то тирамоҳи соли гузашта мегуфтанд, ки Татишев ҳангоми шикор дар натиҷаи як ҳолати тасодуф ҷон бохтааст.
Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube
Шарҳ