Оҳи мусофирон ва дағалгуфтории пулчинаки хатсайри 25

Рӯзи 12 октябр, субҳи ҷумъа, ки дар аксари кишварҳои мусалмонӣ рӯзи хайру саховат ва рузи муборак ба шумор меравад, мебоист мардуми дигари мусулмони ҷаҳонро низ ба корҳои неку шоиста дар ин рӯз водор намояд.

Мутаассифона, мусофироне, ки соати 8-и субҳи ҳамин рӯз ба мусофирбари хатсайри 25, рақами давлатияш 2586ТТ05 аз маҳаллаи Зарафшон вориди нақлиёт шуданд, бар замми дучори дағалиҳои пулчинаки мусофирбари мазкур шудан, боз бақияи пулашонро бо ҷангу ҷанҷол ва бархе умуман 40 дирамашонро нагирифтанд. Ҳар нафаре, ки баъди додани пул чил дирамашро талаб мекард, пулчинак бо дағалии ба худаш хос посух медод, ки мусофирон ӯро фиреб карда истодаанд. Азбаски мардум ба кор шитоб доштанд, дар истгоҳҳо низ одамон бисёр ва ронандаву пулчинакҳои баднафс мусофиронро мисоли ҳезум дар нақлиёташон тал зада, гӯё картошкаву пиёз мебурда бошанд, парвои чӣ гуна ба манзил расидани марудмро надоштанд. Пиразане, ки синнаш ба 70 дакка мехурд, бо сабаби пур будани нишастгоҳҳо ҳатто имкони доштани трубаи мусофирбарро накарда, ба ҳар тараф алвонҷ мехӯрд.
Мусофироне, ки чунин амали ронандаро маҳкум мекарданд, дучори чунин посухи дағалонаи ронандаву пулчинаки сару рӯяшон пур аз ифлосӣ мешуданд: «Маъқулт нестай, ба такси брав, зоратон накардем, ки бшинен, намефорат марҳамат бфроен».
Вақте мусофирбар ба маҳаллаи 82 расид, мотораш аз кор монд ва ронандаву пулчинак аз мошин фаромада, худро ба кариву ба курӣ зада ҳеҷ дар фикри баргардонидани пули мардум набуданд. Пулчинак ноилоҷ ба сӯи мусофирони баҷуръате, ки роҳкирои худро боисрор талаб мекарданд, боз ҳам дағалонаву бадхашмона пулро ҳаво медод, вале мардуми беҷуръат гапашонро гузаронида натавониста, «ҳамон пул заҳри танат шавад» гӯён, рӯ ба нақлиёти дигар оварданд.
Ин ягона мусофирбаре, нест ки бо мусофирон чунин муносибати дағалона менамоянд, чунин ҳолатро ҳар рӯз дар мусофирбарони гуногун дидан мумкин аст, вале касе нест, ки лаҷоми чунин худобехабаронро ба даст гирад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube