Ҷоми ФФТ: «Равшан» дар гурӯҳи «Б» якум

15 феврал дар марҳилаи финалии дарёфти Ҷоми ФФТ-2017, дар гурӯҳи «Б», вохӯриҳои даври дуюм доир шуданд.

«Равшан»-и Кӯлоб  дастаи  «Кӯктош»-и ноҳияи Рӯдакиро пас аз задани голи ягонаи Саидхони Амрохон, дар дақиқаи 39-уми бозӣ, мағлуб намуд.

Бозии дигар байни дастаҳои «Хуҷанд» ва «Ҳосилот» дар натиҷаи ҳисоби мусовии 1:1 ғолибро муайян накард. Фархорӣ Навруз Рустамов ҳисоби бозиро дар қисми аввал кушода, дастаашро пеш баровард. Ба анҷоми вохӯрӣ панҷ дақиқа монда буд, ки хуҷандӣ Манучеҳр Аҳмадов ҳисобро баробар кард – 1:1.

Ҳамин тавр, «Равшан» бо 4 хол дар гурӯҳи «Б» пешсаф шуда, «Кӯктош» бо 3 хол дуюм аст. «Ҳосилот»  бо 2 хол сеюм ва «Хуҷанд» бо 1 хол чорумин мебошанд.

17 феврал даври сеюми бозиҳо дар гурӯҳи «Б» миёни дастаҳои «Равшан» —  «Хуҷанд» ва «Кӯктош» — «Ҳосилот» баргузор мешаванд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube