Омодагии дастаи олимпии Тоҷикистон ба Ҷоми Осиё-2024

Дастаи мунтахаби олимпии футболи Тоҷикистон (U-23) омодагиҳоро ба марҳилаи интихобии Ҷоми Осиё-2024 дар Душанбе шуруъ кард.

Мубин Эргашев, сармураббии тими олимпии Тоҷикистон ба ин ҷамъомад 27 бозигар — 4 дарвозабон, 9 ҳимоятгар, 9 нимҳимоятгар ва 5 ҳамлагарро даъват кардааст. Даста машқҳои худро дар варзишгоҳи «Авиатор»-и пойтахт мегузаронад.

Дастаи мунтахаби ҷавонони Тоҷикистон (U-23) дар моҳи июн бо ҳамсолони худ аз Ҳонконг ду бозии дўстона анҷом медиҳад. Рақобатҳо рўзҳои 15 ва 19-уми июн дар варзишгоҳи «ТАЛКО-Арена»-и шаҳри Турсунзода баргузор мешаванд.

Дастаи мунтахаби олимпии Тоҷикистон (U-23) дар марҳилаи интихобии Ҷоми Осиё-2024 дар гурўҳи «I» бо дастаҳои Австралия, Лаос ва Курёи Шимолӣ вомехўрад. Баргузории марҳилаи интихобӣ дар ин гурӯҳ аз 6 то 12-уми сентябр дар шаҳри Душанбе ба нақша гирифта шудааст.

Ғолибони ёздаҳ гурўҳи интихобӣ ва ҳамчунин чор дастаи беҳтарини ҷойи дуюм ба финали Ҷоми Осиё-2024, ки аз 15-уми апрел то 3-юми майи соли оянда дар Қатар баргузор мешавад, роҳхат мегиранд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube