Писари молики “Султони Кабир” боздошт шудааст

Як манбаъ аз бемористони “Истиқлол”, ки аз ифшои номаш худдорӣ кард, ба Tajikistan times гуфт, кормандони милитса рӯзи 24 март Кабир Кабировро аз бемористон гирифта ва боздоштгоҳ бурданд.

Кабир  Кабиров соати 22.30-и вақти маҳалии рӯзи 23 март бо мошини тамғаи “Лексус-450” дар хиёбони наздики бинои парлумони Тоҷикистон дар маркази Душанбе автомобилро идора карда натавониста ва бо суръати  баланд аввал ба деворчаи бетонии канори роҳ ва баъдан оҳанӣ бархӯрдааст.

Бар асари ин садама мусофирони мошин Саидҷаъфар Саидов ва Некзод Саҳобиддинзода дар маҳали ҳодиса ҷон бохта ва Кабир Кабиров ва Саидвалӣ Убайдуллоев ба бахши эҳёгарии бемористони “Истиқлол”-и Душанбе мунтақил шуданд.

Табибон вазъи саломатии Саидвалӣ Убайдуллоевро қаноатбахш меҳисобанд.

Вазорати корҳои дохилии Тоҷикистон рӯзи 24 март хабар дод, ки нисбати ронанда Кабир Кабиров, писари 18-солаи Аваз Кабиров, молики бозори “Султони Кабир” парвандаи ҷиноӣ боз шудааст.

Кабир Кабиров бо моддаи 212, қисми 3-и Кодекси ҷиноӣ, “вайрон кардани қоидаҳои ҳаракат дар роҳ, ки аз беэҳтиётӣ боиси марги ду ва ё зиёда нафар гардидааст” муттаҳам мешавад.

Гуфта мешавад, Кабир Кабиров дошинҷӯи соли аввали факултаи равобити байналмилалии Донишгоҳи миллии Тоҷикистон будааст.

Дар солҳои ахир дар Тоҷикистон бо ширкати фарзандони афроди бонуфуз ва сарватманд садамаҳои пурсару садо рух дода, бар асари онҳо чанд нафар кушта ва захмӣ шудаанд.

Ҳодисаҳои садама аз ҷониби Расули Амонуллоҳ, писари Амонулло Ҳукумов,раҳбари собиқи шииркати Роҳи оҳани Тоҷикистон дар соли 2013 ва садамаи Фирӯз Саидов, писари муовини сарвазири Тоҷикистон Давлаталӣ Саид аз ҷумлаи онҳост.

Вале дар бештари маворид гунаҳкорони ин садамаҳо ҷазои сазовор намегиранд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube