Резаахбор: Аз бозӣ дар “ТАЛКО-Арена” то CAFA Nations Cup-2023

Дастаи мунтахаби футболи олимпии Тоҷикистон (U-23) таҳти роҳбарии Мубин Эргашев, ки моҳи сентябр дар марҳилаи интихобии Ҷоми Осиё-2024 ширкат мекунад, бо ҳамсолони худ аз Ҳонконг ду бозии дӯстона анҷом медиҳад. Ин бозиҳо рӯзҳои 15 ва 19-уми июн дар варзишгоҳи «ТАЛКО-Арена»-и шаҳри Турсунзода бо дастаи олимпии Ҳонконг баргузор мешаванд.

***

Размикори тоҷики ММА Муҳаммад Наимов ҷаҳорумин намояндаи UFC аз Тоҷикистон шуд. Пеш аз ӯ Нурулло Алиев, Лоиқ Раҷабов ва Муин Ғафуров ба чунин ҳақ соҳиб шуда буданд. Пас аз имзои қарордод бо UFC Муҳаммад Наимов қувваозмоии аввалини худро дар лигаи ин ташкилот шаби 3 ба 4-уми июн дар Лас-Вегас бо размикори австралиягӣ Ҷейми Малларки баргузор мекунад.

***

IBA рейтинги нави муштзанҳоро пас аз Чемпионати ҷаҳон-2023 дар Тошканд нашр кард, ки дар он 10 намояндаи Тоҷикистон ба шумори 50 муштзани беҳтарини сайёра дар вазнҳои худ шомил шуданд. Натиҷаи беҳтаринро дорандаи медали биринҷии Чемпионати ҷаҳон-2023 Баҳодур Усмонов соҳиб шуда, дар вазни то 63,5 кило дар радабандӣ зинаи 4-умро ишғол мекунад.

***

Дастаи мунтахаби футболи Тоҷикистон дар Душанбе омодагиҳоро ба CAFA Nations Cup-2023, ки аз 11 то 20-уми июн дар Тошканд баргузор мешавад, оғоз кард. Сармураббӣ Петер Сегрт 26 бозигарро ба ҳайат даъват кардааст, ки ҳоло ҳамагӣ 14 бозигар дар ин ҷамъомад ширкат доранд. Бозигарони дигар, ки легионерҳо ҳастанд, дар Тошканд ба ҳайати дастаи мунтахаб мепайванданд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube