Рогозинро ба Амрико роҳ надоданд

Роҳбари Агентии кайҳоншиносии Амрико (NASA) Ҷим Брайденстайн гуфтааст,ки сафари роҳбари Роскосмос Дмитрий Рогозин ба ИМА-ро, ки қарор буд, моҳи феврали соли равон баргузор шавад, бекор мекунад.

Брайденстайн дар суҳбат бо The Washington Post гуфт, Агентӣ  тирамоҳи соли гузашта Рогозинро, ки номи ӯ дар рӯйхати таҳримшудаҳо ҳаст, ба хотири ҳифзи «робитаҳои наздики корӣ» ба ИМА даъват карда буд. Вале баъди танқиди сахти як қатор сенаторҳо ин тасмим бозбинӣ шуд.Аз ҷумла, сенатори демократ Ҷин Шаҳин Рогозинро яке аз меъморони «маъракаи таҷовузкорона»-е номид, ки Кремл зидди ҳамсояҳои худ пеш мебарад. Ба гуфтаи сенатор, Рогозин ҳамчунин бо изҳоротҳои зиддиамрикоияш маъруф аст ва сафари ӯ ба ИМА амнияти миллии Амрикоро халалдор мекунад.Суханони Шаҳинро муовини раиси кумитаи иктишофии Сенат Марк Уорнери демократ ва раиси зеркумитаи фазонавардӣ Тед Крузи ҷумҳурихоҳ низ ҷонибдорӣ карданд.Дмитрий Рогозин ҳанӯз дар замони муовини сарвазири Русия буданаш ба рӯйхати таҳримшудаҳо ворид шуда буд. Ӯ бо изҳоротҳои тунди зиддиамрикоияш маъруф аст. Брайденстайн моҳи октябри соли гузашта аз Русия дидан карда буд. Ба иттилои Politico, он замон ӯ аз Рогозин даъват карда буд, ки аввалҳои соли равон аз қароргоҳи NASA дар Ҳюстон боздид кунад.Ҷонибҳо бо вуҷуди сард шудани муносибатҳои ИМА ва Русия дар бахши кайҳоннавардӣ ҳамкорӣ мекунанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube