Сомонаи мобилӣ ё замимаи мобилӣ. Кадоме беҳтар аст?

“Дар ниҳоят, танҳо замимаҳои мобилӣ боқӣ хоҳанд монд. Ҳама чизи боқимонда дар муборизаи нобаробар бо суръати баланди зиндагӣ ва хоҳиши худмухтор будан нобуд хоҳанд шуд».

Каме дар бораи назария

Пеш аз ҳама, биёед бифаҳмем, ки сомонаи мобилӣ аз замимаи мобилӣ бо чӣ фарқ мекунад, зеро ҳатто корбарони ботаҷрибаи интернет аксар вақт ин мафҳумҳоро омехта мекунанд. Сомонаи мобилӣ ё версияи мобилии сомона як намунаи намоиши он дар браузери дастгоҳи мобилӣ мебошад, ки ба андозаи он мутобиқ карда шудааст ва дуруст кор мекунад. Замимаи мобилӣ бошад, нармафзорест, ки тавассути дастгоҳ алоҳида ё ба таври дигар насб карда мешавад ва новобаста аз браузер кор мекунад.

Бале, нуқтаи асосӣ ин ҷо дар робита бо браузер аст! Замимаи мобилӣ алоҳида аст.

Бо вуҷуди ин, бояд қайд кард, замимаҳои қалбакии мобилие мавҷуданд, ки аслан вебсайтанд, аммо ҳамчун барномаи алоҳида кор мекунанд. Аммо ин як ҳолати махсус аст. Онҳоро барномаҳои псевдомобилӣ меноманд.

Намунаи мобилӣ

Бояд дарк намуд, ки ҳар як сомонаи муосир бояд намунаи мобилӣ дошта бошад. Ва ин ҷо сухан ҳатто дар бораи эҳтиром ба корбаре нест, ки набояд намунаи бузурги мизи кориро болову поён ҳаракат дода ва аз чунин амал пайваста хашмгин шавад.

Пеш аз ҳама, сухан дар бораи табдили бомуваффақияти меҳмонон ба мизоҷон дар сомонаи шумо меравад.

Ба эҳтимоли зиёд, сарчашмаи интернетиеро, ки тариқи телефони мобилӣ номувофиқ кор мекунад, корбар шояд ҳамеша тарк кунад. Ва меҳмонони дигар маълумоти заруриро пайдо карда наметавонанду саҳифаи хизмати зарурӣ ё корти маҳсулоти дилхоҳро боз намекунанд.

Миллионҳо сомонаҳо имрӯз намунаи муътадили мобилӣ надоранд ва ҳатто пай намебаранд, ки чӣ тавр ҳамарӯза муштариёнро аз даст медиҳанд.

Умуман, худи намунаи мобилии сомона хеле мураккаб аст, он ба қарорҳои гуногуни дастгоҳҳои мобилӣ мутобиқ карда мешавад, дар ҳоле ки системаи амалиётӣ низ ба назар гирифта шудааст. Масалан, сомонаҳо барои iPhone ва Android ба таври гуногун ҷойгир карда мешаванд, зеро браузерҳо як кодро бо тафсири комилан дигар қабул мекунанд.

Замимаи мобилӣ

Замимаи мобилӣ аз намунаи мобилии сомона як зина болотар меистад. Ин мураккабтар аст ва таҳияву нигоҳдории ҷиддиро талаб мекунад. Он аз тартиби ҷойгиркунӣ дар play-маркетҳо мегузарад, дар ҳоле ки шумо танҳо сомонаро дар хостинги худ ҷойгир мекунед.

Бартарӣ он аст, ки замима ҳамеша дар телефони шумост, он гоҳ-гоҳ бо push-огоҳиномаҳои махсус чизеро ба шумо хотиррасон менамояд ва мушкилоти зиёдеро ҳал мекунад, дар ҳоле ки намунаи мобилии сомона аксар вақт барои намоиши хидматҳо ё молҳо дар мағозаҳои онлайн хизмат мекунад ва сипас фармоиш медиҳад.

Замимаи мобилӣ дар аксари мавридҳо дорои интерфейси дӯстона, тугмаҳои калон аст ва аксар вақт тезтар кор мекунад, зеро он як қисми маълумоти худро аллакай дар дастгоҳ нигоҳ медорад ва онро як маротиба ҳангоми оғозёбӣ зеркашӣ мекунад. Ин кэш номида мешавад.

Зиёдатӣ не, зарурӣ…

Аксар ширкатҳо ҳам замимаи мобилӣ ва ҳам сомонаи пурра бо намунаи мобилӣ доранд.

Ва ин чизи зиёдатӣ не, балки зарурист.

Аввалан, фарогирии васеътари аудитория ва дар натиҷа, фурӯшҳои бештар.

Дувум, омили имиҷ барои тиҷорат.

Савум, садоқат ба мизоҷи худ ва ғамхорӣ нисбати ӯ тавассути хидматҳои мувофиқ.

Албатта, ин арзон нест, аммо имрӯз сифати хизматрасонӣ ва ғамхорӣ нисбати муштариён ба тиҷорати муосир дар саросари ҷаҳон имкон медиҳад, ки бомуваффақият рушд кунад ва ҷойҳои нав эҷод намояд.

Агар ягон суолатон боқӣ монда бошад, метавонед шахсан ба ман тавассути телеграмм нависед: @gkmatador

Муаллифи гӯша:

Максим ШУМСКИХ,

Директори генералии ширкати байналмилалии IT «Матадор»

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube