Тоҷикдухтар дар Қирғизистон намояндаи СММ шуд

Як духтари 16-солаи тоҷики муқими Қирғизистон барои талош ва ҳимоят аз ҳаққи духтарон ба таҳсил, намояндаи СММ дар миёни духтарон эътироф шуд. Марҷона Абдураззоқова — хонандаи синфи 11-и мактаби тоҷикии деҳаи Учқурғони шаҳри Қадамҷо барои ба мактабу донишгоҳ овардани духтарони ин ноҳия саҳм гузошта ба ин мақом сазовор шудааст.

Джералд Гюнтер — намояндаи бахши занони дафтари СММ дар Қирғизистон барои эътирофи мақоми ин ҷавондухтари тоҷик, ба ӯ як санади байналмиллалиро низ тақдим кардааст. Мавлонҷон Абдураззоқов, падари Марҷона, ки ҳоло муовини раҳбари Созмони тоҷикони Қирғизистон ба номи Рӯдакӣ аст гуфтааст, аз ин муваффақияти духтараш хушҳол аст.

Вай таъкид кард, ки Марҷона дар як соли ахир се дафъа ба шаҳри Ӯш сафар карда, давраҳои омӯзишии Созмони Миллалро, ки барои занону духтарони ҷавони деҳотӣ пешбинӣ шудааст, фаро гирифта буд.

Падари Марҷона мегӯяд, “духтараш дар деҳаи Учқурғон гурӯҳи хонандагони мактаби ба номи Садриддин Айниро ҷамъ оварда, барояшон дар ростои аз байн бурдани зӯроварӣ дар мактаб, муносибати солими хонаводагӣ, озодаву пок нигоҳ доштани кӯчаҳои деҳа ва оби ошомиданӣ, суҳбатҳо анҷом додааст”.

Ҳоло Марҷона Абдураззоқова гуруҳи 22-нафараи духтарони ҳамфикрашро ҳамчун лидер ба унвони намояндаи Созмони Милал раҳбарӣ мекунад. Падари ӯ мегӯяд, духтараш ҳамеша талош мекунад барои рафъи бесаводӣ миёни духтарони мактабхон муборизаашро идома диҳад.

Марҷона Абдураззоқова нахустин хонандаи мактабҳои тоҷикии Қирғизистон мебошад, ки ба чунин муваффақият даст ёфтаааст. Волидони ин духтар мегӯянд, “таваҷҷӯҳ ба рӯзгори занону духтарони деҳот, ҷалби ҳар чӣ бештари онҳо ба умури иҷтимоӣ ва сифатҳои лидер будан аз айёми хурдсолӣ, ӯро дар ин роҳ муввафақ кардааст”.

Ҳоло хонаводаи Марҷона дар Қирғизистон ба сар мебаранд ва ӯ фарзанди хурдии хонавода аст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube