Ӯзбекистон: Бародарони тоҷик, Роғунро созед!

Абдулазиз Комилов – вазири корҳои хориҷии Узбекистон  дирӯз  дар Тошканд гуфт, ки кишвараш «дар маҷмӯъ, мухолифи сохтмони нирӯгоҳи Роғун нест, аммо ин сохтмон бояд бо назардошти манфиати кишварҳои минтақа сурат гирад».

Ин нахустин бор аст, ки раҳбари сиёсати хориҷӣ ва як мақоми баландпояи Узбекистон дар бораи тарҳи барои Тоҷикистон сарнавиштсози Роғун ба ин лаҳн сӯҳбат мекунад. Баёноти Абдулазиз Комилов аз мавқеи ҳукумати даврони Ислом Каримовпрезиденти  нахустини Узбекистон, комилан фарқ дорад.Комилов дар масъалаи Роғун дар гуфтугӯи мустақими аввалинаш дар пресс-клуби байналмилалии Тошканд изҳори назар кард. Дар робита бо шурӯи сохтмони ин нирӯгоҳ ва мавқеи ҳукумати Узбекистон ба дурнамои ин тарҳ саволе аз як сокини Приаралйе ворид шуд.Вазири умури хориҷии Узбекистон дар посух ба ин мавзӯъ муфассал сӯҳбат кард ва аз ҷумла гуфт, барои ҳалли баҳси Роғун СММ ду эъломияро пешниҳод кард, ки марбут ба Амударё ва Сирдарё аст. «Барои мо ин санад дар маҷмӯъ қобили қабул аст, барои Қазоқистон ҳам мақбул аст. Тоҷикистон онро баррасӣ дорад, Қирғизистон ҳанӯз посухи рӯшан надодааст. Мавқеи мо ин аст, ки дигар алтернативаи расидан ба созиши минтақавӣ оид ба танзими оқилонаву одилонаи захираҳои обии Осиёи Марказӣ вуҷуд надорад».Абдулазиз Комилов гуфт, умедвор аст, музокироти гурӯҳҳои коршиносон дар ин замина базудӣ шурӯъ мешавад ва ҷонибҳо ба тафоҳум даст меёбанд. «Ин танҳо роҳҳал аст», — гуфт вазири корҳои хориҷии Узбекистон. Вай дар идома гуфт, «он ки мо ба шурӯи сохтмони Роғун вокуниш накардем, ба маъное нест, ки мавқеи мо дигар шудааст. Мавқеи принсипиалие, ки мо ҳифз кардаем, ин аст, ки дар ҷараёни сохтмони чунин саддҳои азим, бояд мавқеи кишварҳои болообу поёноб ба инобат гирифта шавад. Мо ба дӯстони тоҷикамон намегӯем, ки “сохтмони Роғунро қатъ кунед”. Марҳамат, бисозед. Вале биёед дар заминаи баъзе кафолатҳо бар асоси ҳамин эъломияҳо ба тавофуқ бирасем. То ки ҳаққи шумову мо навишта шавад. Механизме бояд бошад, ки дар сурати сар задани баҳс онро ҳал кунад».Комилов аз таҷрибаи байналмилалии ҳалли баҳсҳои обии миёни Амрико ва Канада, Амрикову Мексика ва кишварҳои Ховари Миёна ёд кард, ки муваффақиятомез будааст.​Вазири корҳои  хориҷии Узбекистон инчунин гуфт, кишвараш хостори равобити дӯстонаву хуб бо Тоҷикистон аст ва ин мавзӯъ, ба гуфтаи ӯ, ахиран дар як филми мустанаде инъикос шуд, ки дар телевизиони маҳаллӣ ба намоиш даромад. Вай, аз ҷумла, гуфт: «Дар ин филм масъалаи доғе ба мисли обанбори Фарҳод чунон матраҳ шудааст, ки кас мехоҳад худи фардо рафта созиш кунад. Ҳалли ин баҳс бо бародарони тоҷикамон хеле боназокат пешниҳод шудааст».Обанбори Фарҳод дар ҳудуди ноҳияи Спитамени вилояти Суғд ҷойгир аст ва ҷониби Узбекистон хостори дастрасии озод ба ин обанбор мебошад

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube