Нархи сафар ба Ҳаҷ маълум шуд

Нархи хизматрасониҳои сафар ба Ҳаҷ дар соли 2025-ум 56 ҳазору 800 сомонӣ муқаррар карда шуд, ки ин нисбат ба соли гузашта 200 сомонӣ арзонтар аст. Пардохти маблағ танҳо тавассути “Ориёнбонк”  тариқи ғайринақдӣ анҷом дода мешавад.

Сафари Ҳаҷ дар соли 2025 дар нимаи дуюми моҳи май оғоз мешавад ва то нимаи моҳи июн давом хоҳад кард.

Дар нархномаи сафар тамоми хидматрасониҳои муҳим дохил шудаанд, аз ҷумла:

• харида чиптаи ҳавопаймо (рафту баргашт);
• иҷораи меҳмонхона дар Макка ва Мадина;
• хизматрасонии роҳбаладон;
• таъмини се вақт хӯрок дар давоми сафар;
• шароити иқомат дар Мино, Арафот ва Муздалифа;
• пардохти маблағи қурбонӣ;
• нақлиёти интиқоли ҳоҷиён дар масири Ҷидда-Макка-Мино-Арафот-Муздалифа-Мино-Макка-Мадина;
• ташкили нуқтаҳои тиббӣ ва таъмини доруворӣ;
• суғурта;
• пардохти боҷи давлатӣ;
• китоб дар бораи маносики Ҳаҷ ва таҳияи бейҷикҳо.

Ба гуфтаи Афшини Муқим, сухангӯи Кумитаи дин, танзими анъана ва ҷашну маросим дар Тоҷикистон, ин нархнома бо Хадамоти зиддиинҳисории Тоҷикистон мувофиқа шудааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube