Оқибати ярч дар канали Марғедар бартараф мешавад

Ба асари боришҳои пайдарпайи ҳафтаи гузашта дар мавзеи Тагоби халқи Ҷамоати деҳоти Ворӯ ярч фаромада, ба канали Марғедар зиёни ҷиддӣ расонид.

Тавассути ин канал беш аз 5 ҳазор гектар заминҳои кишт ва боғу токзори хоҷагиҳои деҳқонӣ ва шахсӣ обёрӣ мешаванд.

Тавре дар ҷараёни боздиди раиси шаҳри Панҷакент Абдухолиқ Холиқзода аз мавзеи зиёндида иттилоъ дода шуд, ба сабаби ярч масофаи беш аз 80 метри маҷрои канал бо хоку гил ва сангпораҳо пур шудааст.

Мақомоти шаҳри Панҷакент барои бартараф намудани оқибати офати табиӣ, тоза намудани маҷрои канал аз хоку гилу сангпораҳо тадбирҳои фаврӣ андешид ва ҳоло ҳамаи техникаю механизмҳои идораи давлатии беҳдошти замин ва обёрии ҳавзаи дарёи Зарафшон ин ҷо сафарбар шудаанд ва кор шабонарӯзӣ идома дорад.

Тавре мутахассисон шарҳ доданд, баъди тоза кардани маҷрои канал дар ин мавзеъ корҳои бетонпӯш намудани он, ки оғоз шуда буд, идома дода,баъди анҷоми он ба канал об баста мешавад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube