Ҷашни Наврӯз дар Париж

Ҷашни Наврӯзи соли 2025 дар Париж бо аҳамияти бисёре тавассути чандин анҷумани фарҳангӣ таҷлил гардид. Аз ҷумлаи муҳиммтарини онҳо барномаҳое буд, ки Тоҷикистон мубтакири он будааст ва ё ҳамкорӣ кардааст.  

Нахустин ҷашни бошукӯҳ, ки дар он беш аз 14 кишвари ҷаҳон ширкат карданд, барномаи Наврӯзии ЮНЕСКО буд, ки бегоҳи 18 март бургузор шуд.

Ёдовар мешавем, ки созмони ЮНЕСКО соли 2009 ҷашни Наврӯзро дар ганҷинаи худ ворид намуда, онро ҷаҳонӣ эълом кард.

Дар толори бузурги ЮНЕСКО кишварҳои Эрон, Тоҷикистон, Афғонистон, Узбекистон, Туркия, Ироқ, Озарбойҷон, Ҳиндустон, Қазоқистон, Қирғизистон, Муғулистон, Покистон ва Туркманистон      ширкат карданд. Дар ин барнома ҳар кишвар мизи наврӯзии худро бо корҳои ҳунарӣ ва хӯрокҳои суннатӣ оро дода, пешкаши меҳмонон карданд. Дар бахше аз ин барнома ҳунармандони ин кишварҳо бо мусиқии суннатии худ низ ҳунарнамоӣ карданд.

Намояндагии Тоҷикстон бо сарварии Дилшод Раҳимӣ низ мизи вежаи Тоҷикистонро ба гунаи бисёр зебо ба намоиш гузошта буданд.

Барномаи бисёр зебое, ки ба муносибати ҷашни Наврӯз бо кушиши Сафири Тоҷикистон дар Фаранса, Ҷамолиддин Убайдуллоҳ ва ҳамкорони эшон тавассути ҳунармандон тоҷик анҷом шуд, хотирмон буд.

Барномаи балети тоҷик, аз ҷониби ҳунармандони Театри академии опера ва балети ба номи Садриддин Айнии шаҳри Душанбе бо роҳбарии Камолиддин Сайфиддинзода дар яке аз зеботарин театрҳои Париж — «Théâtre du Gymnase Marie-Bell»  26 март пешкаши тамошобин шуд. Ин барномаи ҳунарӣ бо ширкати 32 ҳунарманд дар панҷ бахш иҷро гардид. Балети тоҷикро тамошобини фаронсавӣ бисёр хуш истиқбол карданд ва борҳо эҳсоси қадрдонии ҳудро бо каф задан нишон медоданд. 

Аз ҷумлаи ҷашнҳои бошукӯҳи Наврӯзӣ дар Париж, барномаи анҷумани «Рӯзи ҷаҳони Наврӯз» буд, ки имсол понздаҳумин барномаи Наврӯзии худро дар толори шаҳрдории Париж рӯзи якшанбе, 30 март баргузор кард. Дар ин барнома, ки шомили 23 бахш буд аз кишварҳои гуногун — Эрон, Франса, Тоҷикистон, Ӯзбекистон, Қазоқистон, Афғонистон ва ҳунармандони уйғурӣ ва курдӣ, ки дар Париж зиндагӣ мекунанд танзим ва иҷро гардид. Дар ин ҷашнвора фарҳанги чандин кишварҳои ҳавзаи Наврӯз ба гунаи бисёр зебо бо намоиши либосу таомҳои миллӣ ва  мусиқиву рақси кишварҳои номбурда, мавриди таваҷҷуҳи сокинони Фаронса қарор гирифт.

Дар умум, ҷашни Наврӯз дар Фаронса бо шукуҳу шаҳомати хос таҷлил шуд ва фарҳанги ориёиро бори дигар дар қалби Аврупо ба намоиш гузошт.

Масъуди Миршоҳӣ,

Раиси Анҷумани Рӯдакӣ дар Париж,

узви ҳайати мушовараи ҳафтаномаи “Тоҷикистон”

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube