Дастоварди ҷаҳонии олими тоҷик

Дар маҷаллаи бонуфузи сатҳи ҷаҳонӣ, махсусан маҷаллаҳои раддаи Q1 ва Q2 мақолаи илмӣ нашр кардан хеле кори душвор ва дастоварди бузург ба ҳисоб меравад. Вале аз байни мақолаҳои дар як шумора чопшаванда баргузида шудани мақолаи алоҳида барои нашр дар муқова — ин дастоварди хеле бузург ва таърихӣ аст.

Шумораи 10-и маҷаллаи бонуфузи Nature Synthesis-ро, ки импакт-фактори зиёда аз 8 дорад (Q1) ва натиҷаҳои пажӯҳиш дар самти кимиё ва маводшиносиро нашр мекунад, акси кристалҳои сохтаи донишманди тоҷики муқими Канада доктор Махсуд Саидаминов оро медиҳад.

Мақолаи илмии гурӯҳи Махсуд Саидаминов “Reproducible high-quality perovskite single crystals by flux-regulated crystallization with a feedback loop” ном дошта, ба танзими суръати рушди кристалҳо бахшида шуда, дар он усули нави назорати рушди кристалҳо пешниҳод шудааст.

Махсуд Саидаминов роҳбари илмии Canada Research Chair Tier II дар самти маводи функсионалии пешрафта ва устоди кафедраи кимиёи Донишгоҳи Викторияи Канада буда, хатмкардаи мактаби миёна дар Тоҷикистон, Донишгоҳи ба номи Ломоносови шаҳри Маскав (ҳам маълумоти олӣ ва ҳам аспирантура), солҳои гуногун постдоктор дар KAUST ва олими даъватӣ дар Massachusetts Institute of Technology ва устоди Донишгоҳи Торонто буданд.

Махсуд Саидаминов муаллифи зиёда аз 130 мақолаи илмӣ дар бонфузтарин маҷаллаҳо, аз қабили Science, Nature, Nature communications, Nature Energy, Nature nanotechnology, Nature Reviews Materials, ACS Energy Letters, Chemical communications, Advanced Optical Materials, Cell Reports Physical Science, Physical Review ва ғайра мебошанд.

Махсуд Саидаминов чандин бор аз тарафи Clarivate Analytics ҳамчун олими сериқтибостарин ва аз тарафи Research.com ситораи тулуъкунандаи илм эътироф гаштаанд. Мувофиқи маълумоти пойгоҳи Google Scholar h-индекси ин донишманди тоҷик ба 68 баробар аст.

Ризои БАҲРОМЗОД

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube