Левакант. Нақшаи сохтмони 32 синфхона дар як сол

Дар назар аст, ки дар шаҳри Левакант корҳои сохтмонӣ дар ду муассисаи томактабӣ шуруъ карда шавад. Ҳамчунин барои беҳтар кардани шароити таълим бунёди 32 синфхонаи иловагӣ дар нақша аст.

Файзулло Раҳимзода, мудири бахши маорифи шаҳри Левакант дар суҳбат бо Pressa.tj гуфт, ки сентябри соли 2024 як бинои иловагӣ дар назди муассисаи таълимӣ ба истифода дода шуд. Ӯ мегӯяд, ҳоло дар Ҷамоати деҳоти Гулистон аз ҷониби “Дирексияи сохтмони иншооти ҳукуматӣ” –и Дастгоҳи иҷроияи Президенти Ҷумҳурии Тоҷикистон сохтмони бинои иловагӣ иборат аз 28 синфхона рафта истодааст. Ба таъкиди вай баъди ифтитоҳи иншооти мавриди назар 320 хонанда дар ду баст бо ҷойи нишаст таъмин мешаванд.

“Дар деҳаи Хуррамдеҳ сохтмони бинои иловагии дорои 4 синфхона рӯзҳои наздик оғоз мешавад, ки ин ба беҳтар кардани шароити таълим мусоидат мекунад”,-гуфт ӯ.

Файзулло Раҳимзода мегӯяд, ба хотири фарогирии бештари кӯдакон ба муассисаҳои томактабӣ мақомоти маҳаллӣ ба бунёди кӯдакистон таваҷҷуҳ зоҳир кардааст. Ӯ афзуд, ки дар наздиктарин фурсат сохтмони ду кӯдакистон дар шаҳри Левакант оғоз карда хоҳад шуд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube