Маҳдудият дар самти Душанбе — Хуҷанд: Роҳ барои мошинҳои боркаш баста аст

Кумитаи ҳолатҳои фавқулодда ва мудифаи граждании назди Ҳукумати ҶТ бо истинод ба хабари навбатдори ширкати роҳи IRS хабар медиҳад, ки 8-уми январи соли 2023 дар роҳи мошингарди Душанбе — Хуҷанд бар асари бориши барфи шадид ба ҳаракати мошинҳои боркаш маҳдудиятҳо ҷорӣ шудааст.

Гуфта мешавад, ки роҳ танҳо барои ҳаракати мошинҳои сабукрав боз аст. Бо мақсади вокуниши фаврӣ ва таъмини бехатарии ҳаракат дар роҳи ёдшуда Кумита дар минтақаҳои осебпазир, бахусус Майхӯраи ноҳияи Варзоб ва километри 72-уми роҳи Душанбе — Айнӣ, ҳамчунин роҳи мошингарди Душанбе — Ванҷ постгоҳҳои шабонарӯзӣ ташкил намудааст.

— Бо вуҷуди андешидани чораҳои фаврӣ барои таъмини амният дар роҳҳо хатари яхбандӣ, лағзиши тарма ва барфтӯда дар роҳҳо боқӣ мемонад,- меафзояд манбаъ.

Кумита ба ронандагон, бахусус онҳое, ки ин шабу рӯз сафар бо роҳҳои кӯҳӣ доранд, чунин тавсия додааст:

— Чархҳои тобистонаро бо зимистона иваз кунед, системаи гармкунии мошинро бадиққат санҷед. Пеш аз сафар бо худ қисмҳои эҳтиётии заруриро бигиред, бахусус лампаҳои равшанидиҳандаро барои эҳтиёт дошта бошед.

— Дар бордони мошинатон бояд ҳатман сарулибоси гарм, фонус, бели хурди сафарӣ, банд барои кашидани мошин, сӯзишвории эҳтиётӣ, гӯгирд, термос бо оби гарм дошта бошед.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube