Резаахбор: Аз намояндагии Фаворис то афзоиши мусобиқаҳо

Аз 19 то 23-юми август дар шаҳри Будапешти кишвари Маҷористон Чемпионати ҷаҳонии варзиши сабук баргузор мешавад, ки дар он 2000 варзишгар тақрибан аз 200 даста ширкат мекунанд. Тоҷикистонро дар ин мусобиқа як нафар намояндагӣ мекунад. Ӯ Фаворис Музарапов аст, ки дар давидан ба масофаи 100 метр рақобат хоҳад кард. Касе дар ин масофа рекорд гузорад, соҳиби 100 000 доллар мешавад.

***

Футболбози брализӣ Неймар, ки дар ҳайати дастаи ПСЖ (Фаронса) бозӣ мекард, дар мавсими нав бо дастаи арабии «Ал-Ҳилол» шартнома баст. Неймар бо ин даста шартномаи дусола ба имзо расонд, ки дар маҷмуъ тақрибан 300 миллион евро ба даст меорад. Ў бо рақами 10 бозӣ мекунад ва қарор аст сарвони даста бошад. Ба Неймар соҳибмулкони дастаи «Ал-Ҳилол» ҳавопаймои хусусӣ туҳфа кардаанд.

***

Дастаи нави наврасони Тоҷикистон (U-15), ки моҳи октябри соли оянда дар мусобиқоти интихобии Ҷоми Осиё-2025 ширкат мекунад, дар Чемпионати Ассотсиатсияи футболи Осиёи Марказӣ (CAFA) бозӣ хоҳад кард. Чемпионати CAFA-2023 байни дастаҳои наврасон (U-17) аз 20 то 27-уми август бо ширкати дастаҳои Тоҷикистон, Эрон, Ўзбекистон, Афғонистон ва Қирғизистон дар Варзишгоҳи марказии Ҳисор баргузор мешавад.

***

Конфедератсияи футболи Осиё (КФО) мусобиқаҳои байни кулбҳоро ба се расонд. Акнун мусобиқаи бонуфузи қора бо номи Элитаи Лигаи қаҳрамонҳои КФО (ACLE) ёд мешавад, ки дар он 24 клуби беҳтарини қитъа бозӣ мекунанд. Мусобиқаи дуюм Лигаи қаҳрамонҳои КФО 2 (ACL2) аст, ки аз 32 даста иборат хоҳад буд ва мусобиқаи сеюм Лигаи даъвати AFC (ACGL) тасдиқ шудааст, ки 20 клуб бозӣ хоҳанд кард.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube