Сармураббиҳои нави хориҷӣ дар дастаи наврасону ҷавонони Тоҷикистон

Ба дастаи мунтахаби наврасони футболбози Тоҷикистон (U-17) ва дастаи мунтахаби ҷавонони футболбози Тоҷикистон (U-20) мураббиҳои хориҷӣ даъват шуданд. 

Мутахассиси 56-солаи итолиёвӣ Марко Раҷинӣ сармурабии нави дастаи мунтахаби наврасони Тоҷикистон (U-17) таъйин шуд. Таҳти роҳбарии ӯ наврасони кишвар ба марҳилаи интихобии Ҷоми Осиё-2025, ки моҳи октябри соли ҷорӣ баргузор мешавад, омодагӣ мегиранд.

Марко Раҷинӣ дар кишварҳои Итолиё ва Сан-Марино фаъолият кардааст. Ҳамчунин дар дастаҳои футболи Литва, Конго, Ниҷерия, Муғулистон ва Малайзия таҷрибаи корӣ дорад. Аз соли гузашта Марко Раҷинӣ ба ҳайси директори техникии Академияи «Ювентус» дар Душанбе ва мушовири раёсати техникии Федератсияи футболи Тоҷикистон адои вазифа мекунад.

Мутахассиси 52-солаи словенӣ Милош Костич сармураббии нави дастаи мунтахаби ҷавонони Тоҷикистон (U-20) таъйин шуд. Ӯ дастаро ба марҳилаи интихобии Ҷоми Осиё-2025, ки моҳи сентябри соли ҷорӣ баргузор мешавад, омода мекунад.

Костич дар замонҳои гуногун сармураббии дастаҳои наврасон (U-17) ва ҷавонони (U-19) Словения буд. Ӯ ҳамчунин бошгоҳҳои «Срвена Звезда» (Сербия), «Железничар» (Босния ва Ҳерзоговин), «Ахарнаикос», «Ираклис», «Трикала» (ҳама аз Юнон), «Люфтетари» (Албания) ва «Сент-Трюден» (Белжик)-ро роҳбарӣ кардааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube