Бориши барф дар рӯзҳои оянда. Сардӣ аз Русия меояд (аудио)

Бино ба иттилои Агентии ҳавошиносии Тоҷикистон, рӯзҳои 10-14-уми январи соли 2023 бар асари ворид гардидани ҳавои сард аз самти аврупоии Федератсияи Русия дар қисмати бештари кишвари мо низ ҳаво сард мешавад ва барфи шадид меборад.

Рӯзҳои 11-14-уми январ дар водиҳо ва ноҳияҳои наздикуҳии ҷумҳурӣ дамои ҳаво шабона 8-13 то 14-19 сард ва рӯзона аз 2-7 то 7-12 дараҷа хунук мешавад. Дар ноҳияҳои куҳӣ шабона ҳарорати ҳаво аз 11-16 то 19-24 дараҷа коҳиш ёфта, дамои рӯона аз 5-10 то 12-17 дараҷа хоҳад буд.

Рӯзҳои 14-16-уми январ дамои ҳаво дар ноҳияҳои куҳӣ коҳиш меёбад ва то ба 32-37 дараҷа сард мешавад. Дар Булункули ноҳияи Мурғоб бошад, ҳаво то -50 дараҷа сард хоҳад шуд.

10-уми январ ва шаби 11-уми январ дар аксари ноҳияҳои ҷумҳурӣ, ҳамчунин дар ағбаҳо барфи пуршиддат меборад, дар роҳҳои мошингард хатари яхбандӣ вуҷуд дорад. Рӯзҳои 10-11-уми январ дар ноҳияҳои алоҳидаи вилоятҳои Суғд ва Хатлон ва ноҳияҳои тобеи ҷумҳурӣ шамол бо суръати 17-22 метр дар як сония мевазад.

Рӯзҳои 10-12-уми январ ҳавошиносон лағзиши тармаро дар қисматҳои ҷанубӣ ва шимолии қаторкуҳҳои Ҳисор, ноҳияҳои куҳии тобеи ҷумҳурӣ, ҳамчунин ноҳияҳои ғарбии ВМКБ пешбинӣ мекунанд.