Моҳи феврал агрегати чоруми НБО «Қайроққум» ба истифода дода мешавад

Рӯзҳои наздик агрегати чоруми НБО «Қайроққум» ба кор оғоз мекунад. Дар ин бора иҷрокунандаи вазифаи раиси шаҳри Гулистон Илҳом Пӯлотзода зимни нишасти матбуотӣ иттилоъ дод.

 Бино ба маълумоти ӯ, ҳоло 3 агрегати ин неругоҳ пурра фаъолият дорад ва сокинони чанд минтақаи Суғдро бо барқ таъмин мекунад.

Таъкид гардид, ки корҳои сохтмонӣ дар агрегати чорум, дар марҳилаи анҷомёбист. Чанд созмонҳои хориҷӣ ва шарикони рушд барои ба истифода додани агрегати чорум ҷалб карда шудаанд ва корҳои васлкунӣ низ аз тарафи мутахассисон дар ояндаи наздик ба анҷом расонида мешавад.

НБО «Қайроққум» солҳои 1956—1957 сохта шудааст ва дорои 6 гидроагрегат аст, ки иқтидори ҳар кадомаш 21 ҳазор кВт мебошад. Иқтидори умумии НБО «Қайроққум» 126 ҳазор кВт аст.

 Гуфта мешавад, ки баъди пурра ба истифода додани дигар гидроагрегатҳо, ки то соли 2026 пешбинӣ шудааст, истеҳсоли миёнаи солонаи неруи барқ дар НБО «Қайроққум» аз 580 млн. кВт/соат ба 850 млн. кВт соат расонида шуда, сатҳи идоракунӣ ва хизматрасонӣ ба талаботи замони муосир мутобиқ хоҳад шуд.

  Фарзона Шамсиева

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube