Тоҷикистонро боз тӯфони шадиди чангу ғубор фаро мегирад

Аз 8 то 10 майи соли 2025 дар ҳудуди Тоҷикистон тӯфони шадиди чангу ғубор пешбинӣ мешавад.

Тибқи иттилои Агентии обуҳавошиносии кишвар, шароити номусоиди метеорологӣ боиси баланд шудани миқдори зарраҳои муаллақи чанги PM2.5 ва PM10 дар атмосфера гардида, сифати ҳаворо ба таври ҷиддӣ коҳиш медиҳад.

Ба гуфтаи мутахассисон, ин зарраҳои майда метавонанд ба саломатии инсон, махсусан кӯдакон, пиронсолон, занони ҳомила ва нафарони гирифтори бемориҳои музмин таъсири манфӣ расонанд.

Тавсияҳои Агентӣ барои рӯзҳои 8–10 май:

-кӯдакон, пиронсолон, занони ҳомила ва шахсони дорои бемориҳои дилу раг ва роҳҳои нафас бояд аз гаштугузори тӯлонӣ дар кӯча худдорӣ намоянд;

-ҳангоми баромадан ба кӯча аз ниқобҳои муҳофизатӣ истифода бурда шавад;

-тирезаҳои хона пӯшида бошанд, ҳавои дохили хона мунтазам тоза карда шавад;

-нӯшидани оби зиёд барои коҳиш додани таъсири чангу ғубор ба бадан.

Масъулин аз сокинон даъват мекунанд, ки дар ин рӯзҳо бештар эҳтиёткор бошанд ва тавсияҳои тиббию экологиро ҷиддӣ риоя намоянд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube