Хадамоти зиддиинҳисорӣ нархи нави сим кортро тасдиқ кард

Хадамоти зиддиинҳисории назди ҳукумати Тоҷикистон фармоиши ин ниҳодро дар бораи тасдиқи нархномаи сим-кортҳои телефонҳои мобил ба унвонии ширкатҳои мухобиротӣ ирсол намуд, ки бар асоси он арзиши ҳар сим-корт дар ҳаҷми 250 сомонӣ тасдиқ шудааст.

Фармоиш “Дар бораи хизматрасонии пайвастшавӣ (яккрата) ба шабакаи операторони алоқаи барқӣ” рӯзи 23 августи соли ҷорӣ таҳти рақами 89 содир шуда, зери он Саъдӣ Қодирзода, сардори Хадамоти зиддиинҳисории Тоҷикистон имзо гузоштааст. Дар асоси ин фармоиш аз ширкатҳои мухобиротӣ тақозо шудааст, ки аз 1 сентябри соли ҷорӣ бақайдгирии сим-кортҳоро бо нархи муқарраршуда оғоз кунанд.Дар матни фармоиш, аз ҷумла, гуфта мешавад, ки нархномаи пайвастшавии яккарата ба шабакаҳои операторони алоқаи барқии Тоҷикистон “бо мақсади таъмини иҷрои протоколи ҷаласаи муштараки ВКД, КДАМ, Хадамоти алоқа ва чор ширкати моблии Тоҷикистон – “Индиго-Тоҷикистон”, “ТТ-мобайл”, “Вавилон-мобайл” ва “Таком” аз 8 августи соли ҷорӣ ва қарори ҳукумати Тоҷикистон аз 30 апрели соли 2016 “Дар бораи тартиб ва талаботи пайвастшавӣ ба шабакаи алоқаи барқӣ”, тасдиқ мешавад.Ширкатҳои мобилӣ бояд ҷараёни бақайдгирии сим-кортҳоро бар асоси шиносномаҳои шарҳвандони Тоҷикистон (ваё шаҳрвадони кишварҳои хориҷӣ) амалӣ намоянд. Назорати иҷрои фармоиши мазкур ба зиммаи  муовини якуми сардори хадамоти Хадамоти зиддинҳисорӣ Назар Одиназода гузошта шудааст.Бар асоси нархномаи тасдиқшуда аз ҷониби Хадамоти зиддиинҳисорӣ, 250 сомонӣ арзиши сим-корт чунин таъин шудааст: 215 сомонӣ – барои пайвастшавӣ ва 35 сомонӣ – барои гузаронидан ба тавозуни муштарӣ. Дар эзоҳи ин санад гуфта мешавад, ки дар сурати зарурати аз нав барқарор кардани сим-корт баъди корношоям ё гум шудани он, ин маблағ дубора пардохт намешавад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube