Шакарханд аз Абдурауф Муродӣ

Беобрӯе номи тифли навзодашро Обрӯй ниҳоду даъво кард, ки “акнун мо ҳам обрӯй дорем”.

***

Дузана, то ки ба ҳар ду занаш маъқул шавад, дурӯя ҳам шуд.

***

Ниҳоят мурғи илҳомаш ба парвоз омад, вале онро зуд паронданд.

***

Аломати саволро расо таъриф карданд, боифтихор қоматашро рост карду ба аломати хитоб табдил ёфт.

***

Касе ба дили ӯ роҳ ёфта натавонист, зеро дилаш хеле сиёҳу торик буд.

***

Бисёр шодӣ намекард аз омади кораш. Метарсид, ки аз шодии зиёд ба куртааш нагунљида, онро бидаронад.

***

Корд ба устухон расид, вале устухон ҳис накард.

***

Марде худро кар муаррифӣ кард. Дашномаш доданд. Гуфт, ки агар мешунидам, љазоятонро медодам. Сад алам, ки карам.

***

Хар ҳафтае ҳангас назаду лагадпартоӣ накард, лекин ҳамоно хараш меномиданд.

***

Ба болои ҳафт қабат кӯрпача мурооташ карданд. Баромада натавонист.

***

Гӯшту рӯғани гӯсфандҳои колхоз ҳама нобуд гашта, дар бадани мудири ферма ва атрофиёни ӯ рӯ заданд.

***

Зани ман низ чароғи хонадон аст, лекин хирасӯз.

***

Дилашро хостанд ба кор гарм кунанд, вале якбора оташ гирифт.

***

“Бе қафомондагон кор мекунем” гуфта, ҳайкалро низ ҳар рӯз ду-се қадам пештар меғељонданд.

***

Нависанда деҳқонест, ки дар панљ-шаш моҳ ҳосил мерасонад. Мунаққид комбайнест, ки дар ду-се соат онро даравида мепартояд.

***

Олимшавандае мунаққидро ҳам ба гурӯҳи хояндагон дохил кардааст.

***

Ҳоло ҳаљми асари адибро на илҳом, балки эҳтиёљи иқтисодияш муайян мекунад.

***

Курра шукр мегуфт, ки ба ҳар ҳол то хар шуданаш хеле вақт ҳаст.

***

Меҳмон ба хон “ҳуљум” кард, мизбон дасту по гум кард.

***

Шайтонро фирефта, ба дасти занаш афтод.

***

Азбаски шамъу парвонагӯӣ дар адабиёт аз ҳадди эътидол гузашт, чароғи барқиро офариданд.

***

Кордаш ҳамеша болои рӯған қарор дошт, вале кунд ки буд, онро бурида наметавонист.

***

Абдурауф МУРОДӢ

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube