Зиндагӣ дар канори нобиға

Дар арафаи ҷашни 80 солгарди бастакор Толибхон Шаҳидӣ ҳамсараш  нависанда Гулсифат Шаҳидӣ аз зиндагии муштарак – муҳаббат, таҳаммул ва рӯзгор дар канори ҳамсари нобиғааш ёдовар шуд.  

Дар арафаи 80 солагии ҳамсарам Толибхон Шаҳидӣ аз ман хоҳиш карданд, ки ин сатрҳоро рӯйи коғаз оварам. Ростӣ, дӯст намедорам, ки дар бораи зиндагии оилавии худ ошкоро сухан гӯям. Оила, хона қалъаи ман ҳастанд. Дар бораи бурду бохтам дар зиндагӣ танҳо ба одамони хеле наздик қисса мекардам. Дар оила зани сахтгир будам, интизом бароям муҳимтар аз ҳама буду ҳаст.

Дар матбуот дар бораи шавҳар, фарзандон ва зиндагии оилавиам камтар сухан мегӯям. Шавҳарам шахсияти ҷамъиятист. Дар бораи ӯ, эҷодаш дар расонаҳо маълумоти зиёде метавон пайдо кард. Ӯ низ одатан кӯшиш мекунад, ки аз суҳбат дар бораи оила худро канор гирад ва мавзуи гуфторро ба маҷрои мусиқӣ равона созад.

Ману Толибхон беш аз панҷоҳ сол аст, ки зиндагӣ мекунем. Се писар ва сенздаҳ набера дорем, ки онҳо маънии зиндагии моянд.

Бисёре аз онҳое, ки маро аз наздик намешиносанд, гумон мекунанд «гаҳвораи ман аз осмон афтода бошад». Гӯё ман ифтихор аз он дошта бошам, ки духтари вазири савдои ҷумҳурӣ, ҳамсари бастакори номдор ҳастам. Аммо воқеият чунин нест. Ман дар оилаи донишҷӯ ба дунё омадам. Падарам дар Санкт-Петербург таҳсил мекарданд, модарам бо он кас буданд ва ман дар ҳамон ҷо, дар як шаби сарди Соли Нав ба дунё омадам. Падарам маро «Ленинградкаи ман» ном мебурданд. Он кас баъдтар вазири савдо шуданд. Вақте ки ман ба шавҳар баромадам, аллакай вазир набуданд. Шавҳари ояндаи ман низ он вақт ҳамагӣ фориғтаҳсили Консерваторияи Москва, нав аз хизмати ҳарбӣ баргашта буданд. Шуҳрат баъдтар омад. Мо ба қуллаҳои зиндагӣ якҷоя баромадем.

Ба назари ман, ҳар касе, ки зиндагиаш солҳои дароз дар канори як шахси эҷодкор ва соҳибистеъдод сипарӣ шудааст, хуб медонад ин чӣ рӯзгорест.  Бибиам Марфуахон набераи нигаҳдори муҳри амири Бухоро буданд. Маҳз он кас ба ман сабр, модарам Масрурахон муҳаббат омӯхтанд. Хушдоманам Марҳабохон бароям намунаи хирад ва шараф буданд. Аммо бештар аз ҳама худи зиндагӣ маро омӯзонд.

Агар модарам намебуданд, эҳтимол донишгоҳро ба анҷом намерасонидам. Ман аз курси сеюм ба шавҳар баромадам ва ду писари маро маҳз модарам ба воя расониданд. Аммо, афсӯс, умри модарам кӯтоҳ буд. То имрӯз худро маломат мекунам, ки бештар дар бораи таҳсил ва ояндаи худ фикр мекардам, на дар бораи саломатии он кас. Дар назди Худованд тавба мекунам ва аз модарам бахшиш мехоҳам.

Пас аз вафоти модарам падарам дигар издивоҷ накарданд. Баъдтар писари сеюмам ба дунё омад. Ҳамин тавр шуд, ки дар оила ягона зан будам. Ман то охири умр падарамро нигоҳубин кардам. Толибхон худро ба мусиқӣ бахшида буданд, фарзандон камол меёфтанд, таҳсил мекарданд ва тамоми бори рӯзгор бар дӯшам афтода буд. Ман мефаҳмидам: агар фарзандонро дуруст тарбия кунам, на танҳо бори зиндагиам сабук мегардад, балки корам низ пеш меравад.

Ва ин ба ман муяссар гардид. Имрӯз писаронам Табриз, Ҳофиз ва Фирдавсхон болҳо, такягоҳ ва пуштибонам ҳастанд. Танҳо Худо медонад, ки ман чиҳоро аз сар гузаронидам. Аммо онҳоро худам медонаму худои болои сарам. Ман бовар доштам, ки тақдири инсон дар бисёр маврид дар дасти худи ӯст.

Толибхон муттакои ман буданд. Ҳам аз нигоҳи маънавӣ ва ҳам рӯҳан. Худо ба он кас истеъдоди бузург додааст ва ман мефаҳмидам, ки бояд барои ҳифз ва рушди ин неъмат ба ӯ мадад кунам. Ин дарк аз аввал пайдо шуд, ҳарчанд дар оғози зиндагӣ барои як зани хеле ҷавон осон набуд. Аммо зиндагӣ маро қавӣ кард ва ба ман омӯхт, ки аз душвориҳо наҳаросам.

Имрӯз ман низ дар ҷодаи эҷод қарор дорам, нависанда ҳастам. Китобҳоям ба шаш забон нашр шудаанд, як қатор ҷоизаҳои миллӣ ва байналмилалӣ гирифтаам. Ҳунари нависандагиро низ то андозае аз Толибхон омӯхтам. Ӯ шаб то саҳар мусиқӣ эҷод мекард ва ман низ шабҳоро дар канори ӯ рӯйи коғазу қалам рӯз мекунам.

Бароям хушоянд аст, ки ӯ маро қадр мекунад ва ҳамеша нақши маро дар зиндагӣ ва дастовардҳои худ таъкид менамояд. Имрӯз фарзандон низ моро дар ҳама кор пуштибонӣ мекунанд. Зеро ҳеҷ дороӣ ҷойи муҳаббатро гирифта наметавонад. Ягон қаср гармии муҳити хонаводаро иваз намекунад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube