Амонатбонк. Рушди устувор, қарзҳои дастрас ва қадамимуҳим дарбонкдории рақамӣ

Натиҷаҳои фаъолияти Корхонаи воҳиди давлатии Бонки амонатгузории Ҷумҳурии Тоҷикистон “Амонатбонк” дар шаш моҳи аввали соли 2026 нишон медиҳанд, ки ин ниҳоди молиявӣ дар баробари таҳкими иқтидори иқтисодии худ, ба дастгирии аҳолӣ, рушди соҳибкорӣ, маблағгузории соҳаҳои истеҳсолӣ ва тавсеаи хизматрасониҳои рақамӣ таваҷҷуҳи бештар зоҳир намудааст. Афзоиши дороиҳо, сармоя, пасандозҳо ва сандуқи қарзӣ, коҳиш додани меъёри фоизи як қатор қарзҳо ва васеъ шудани инфрасохтори пардохтӣ аз мавқеи устувори бонк ва боло рафтани эътимоди мизоҷон шаҳодат медиҳанд.

Нишондиҳандаҳои молиявӣ – заминаи рушди минбаъда

Яке аз муҳимтарин натиҷаҳои фаъолияти Амонатбонк дар нимсолаи аввали соли 2026 афзоиши назарраси нишондиҳандаҳои асосии молиявӣ мебошад. Ба ҳолати 30-юми июни соли равон дороиҳои бонк ба 13 миллиард сомонӣ расидаанд. Ин нишондиҳанда нисбат ба ҳамин давраи соли гузашта 36 фоиз бештар аст.

Уҳдадориҳои бонк 11,8 миллиард сомониро ташкил дода, дар муқоиса бо нимсолаи аввали соли 2025 ба андозаи 38 фоиз афзоиш ёфтаанд. Ҳамзамон, сармояи Амонатбонк ба 1,2 миллиард сомонӣ расидааст, ки афзоиши 16,3-фоизаро нишон медиҳад.

Афзоиши ҳамзамони дороиҳо ва сармоя барои фаъолияти муассисаи молиявӣ аҳамияти махсус дорад. Ин раванд на танҳо аз тавсеаи амалиёти бонкӣ, балки аз афзудани имконияти маблағгузории соҳаҳои иқтисоди миллӣ ва иҷрои саривақтии уҳдадориҳо дар назди мизоҷону шарикон шаҳодат медиҳад.

Фоидаи софи Амонатбонк дар шаш моҳи аввали соли 2026 ба 100 миллион сомонӣ расидааст. Ин маблағ нисбат ба ҳамин давраи соли гузашта 30 фоиз зиёд буда, нақшаи пешбинишуда барзиёд таъмин гардидааст. Бонк ҳамчунин ба буҷети давлатӣ 68 миллион сомонӣ андоз ва дигар пардохтҳои ҳатмӣ ворид намудааст, ки нисбат ба нимсолаи аввали соли 2025 ба андозаи 9,4 фоиз бештар мебошад.

Ин нишондиҳандаҳо собит месозанд, ки фаъолияти самараноки бонк танҳо ба рушди дохилии муассиса маҳдуд набуда, ба ғанӣ гардидани буҷети давлатӣ ва татбиқи барномаҳои иҷтимоию иқтисодӣ низ мусоидат менамояд.

Эътимоди мардум дар афзоиши пасандозҳо

Баланд гардидани ҳаҷми амонатҳо яке аз нишонаҳои асосии эътимоди аҳолӣ ва ташкилотҳо ба низоми бонкӣ мебошад. Дар давраи ҳисоботӣ бақияи умумии амонатҳои шахсони ҳуқуқӣ ва воқеӣ дар Амонатбонк ба 10,5 миллиард сомонӣ расидааст. Ин нишондиҳанда нисбат ба ҳамин давраи соли гузашта 36 фоиз афзоиш ёфтааст.

Ҳаҷми пасандозҳои аҳолӣ 17 фоиз зиёд гардида, бақияи он ба 3,5 миллиард сомонӣ расонида шудааст. Танҳо дар шаш моҳи аввали соли 2026 ба пасандозгузорон 62 миллион сомонӣ даромади фоизӣ пардохт гардидааст.

Барои ҳавасманд намудани шаҳрвандон ба пасандозгузорӣ фоизи пасандозҳои муҳлатноки дусола, сесола ва пасандози «Кӯдакона» аз як то ду банди фоизӣ баланд карда шудааст.

Ин иқдом барои ташаккули фарҳанги пасандозгузорӣ, ҳифзи маблағҳои шаҳрвандон ва ба гардиши иқтисодӣ ворид намудани захираҳои молиявӣ заминаи мусоид фароҳам меорад. Махсусан, пасандози «Кӯдакона» ба оилаҳо имкон медиҳад, ки барои таҳсил, тарбия ва ояндаи фарзандон маблағ ҷамъоварӣ намоянд.

Қарзҳо дар хизмати аҳолӣ ва иқтисоди миллӣ

Дар нимсолаи аввали соли 2026 ҳаҷми умумии қарзҳои пешниҳодкардаи Амонатбонк бо назардошти қарзҳои байнибонкӣ 1,2 миллиард сомониро ташкил додааст. Дар ин давра ба 27,6 ҳазор муштарӣ маблағҳои қарзӣ пешниҳод шудаанд.

Сандуқи қарзии бонк аз 4 миллиард сомонӣ бештар гардида, шумораи қарзгирандагон аз рӯйи бақияи қарзҳо ба 85 ҳазор нафар расидааст. Ҳаҷми сандуқи қарзӣ нисбат ба ҳамин давраи соли 2025 ба андозаи 21,9 фоиз ва шумораи қарзгирандагон 3 фоиз афзоиш ёфтааст.

Маблағҳои қарзӣ ба дастгирии аҳолӣ, кишоварзӣ, соҳибкорӣ, саноат, тиҷорат, сохтмон, хариди манзил ва дигар бахшҳои иқтисодиёт равона гардидаанд.

Ҷиҳати дастгирии истеҳсолкунандагони маҳсулоти кишоварзӣ ва саҳмгузорӣ дар таъмини амнияти озуқаворӣ маҳсулоти нави қарзии имтиёзноки «Дастгирии деҳқон» роҳандозӣ шудааст. Ин ташаббус метавонад ба кишоварзон барои хариди тухмӣ, нуриҳои минералӣ, техника ва дигар воситаҳои истеҳсолӣ имкониятҳои бештар фароҳам орад.

Меъёри қарзҳо паст карда шуд

Бо мақсади дастгирии аҳолӣ ва соҳибкорӣ Амонатбонк меъёри фоизии як қатор маҳсулоти қарзиро коҳиш дод. Аз ҷумла, меъёри қарзҳо барои рушди сайёҳӣ ва ҳунарҳои мардумӣ аз 18 ба 16 фоиз ва барои соҳаи саноат аз 18 ба 15 фоиз поён бурда шуд.

Коҳиш ёфтани фоизи қарзҳо барои соҳибкороне, ки дар бахшҳои истеҳсолӣ, саноатӣ, сайёҳӣ ва ҳунармандӣ фаъолият мекунанд, аҳамияти муҳим дорад. Чунин маблағгузорӣ метавонад ба таъсиси корхонаҳои нав, зиёд гардидани ҳаҷми истеҳсол, муаррифии ҳунарҳои миллӣ ва таъсиси ҷойҳои нави корӣ мусоидат намояд.

Дар нимсолаи аввали соли равон ба 143 муштарӣ қарзи ипотекӣ пешниҳод гардида, ҳаҷми чунин қарзҳо нисбат ба ҳамин давраи соли гузашта 40,7 фоиз ва шумораи қарзгирандагон 24,4 фоиз афзоиш ёфтааст.

Дар доираи ҳамкории бонк бо ширкатҳои сохтмонӣ меъёри қарзҳои ипотекӣ ба 14 фоизи солона баробар гардида, муҳлати истифодаи онҳо то 10 сол муқаррар шудааст. Ин тадбир дастрасии шаҳрвандонро ба маблағгузории хариди манзил беҳтар менамояд.

Ҳамкорӣ бо шарикони хориҷӣ

Амонатбонк барои ҷалби захираҳои молиявӣ ва дастгирии ширкатҳои ватанӣ ҳамкориро бо муассисаҳои байналмилалӣ густариш додааст. Аз ҳисоби хатҳои қарзии Ҷамъияти саҳомии «KazakhExport»-и Ҷумҳурии Қазоқистон ва Бонки давлатии рушди Чин ба 21 ширкати ватанӣ дар маҷмуъ 39,5 миллион доллари ИМА ва 5,9 миллион юани чинӣ маблағҳои қарзӣ пешниҳод шудаанд.

Ҷалби маблағгузории хориҷӣ барои навсозии иқтидори истеҳсолӣ, ворид намудани таҷҳизоти муосир ва татбиқи лоиҳаҳои калони соҳибкорӣ шароити мусоид фароҳам меорад. Ин ҳамкориҳо ҳамзамон мавқеи бонкро ҳамчун шарики боэътимоди бахши хусусӣ тақвият мебахшанд.

Аз хизматрасонии анъанавӣ то бонки рақамӣ

Дар доираи «Солҳои рушди иқтисоди рақамӣ ва инноватсия» Амонатбонк татбиқи хизматрасониҳои нави фосилавиро идома додааст. Бонк ба низоми ягонаи гардиши ҳуҷҷатгузории электронии байниидоравӣ шомил гардидааст.

Тавассути чат-боти AmonatbankBot дархостҳо барои гирифтани қарз ба маблағи 7,3 миллион сомонӣ қонеъ карда шудаанд. Ҳаҷми пардохти қарзҳо тавассути каналҳои рақамӣ аз 180 миллион сомонӣ гузашта, 21 фоизи ҳаҷми умумии пардохтҳои қарзиро ташкил додааст.

Дар ҳамин давра 3052 мизоҷ тавассути пасандози рақамии «Дастрас» 18 миллион сомонӣ пасандоз гузоштаанд. Маҳсулоти нави қарзии рақамии «Онлайн» низ роҳандозӣ гардидааст.

Шумораи истифодабарандагони замимабарномаи “Амонатмобайл” аз 1,7 миллион нафар зиёд шудааст. Тавассути ин барнома шаҳрвандон метавонанд хизматрасониҳои давлатӣ, коммуналӣ ва дигар пардохтҳоро ба таври фосилавӣ анҷом диҳанд. Ба интернетбонкинги Амонатбонк 17 ҳазору 882 корхонаю ташкилот пайваст гардидаанд.

Инфрасохтори фарогир ва масъулияти иҷтимоӣ

Шумораи дорандагони кортҳои пардохтии Амонатбонк ба 2,1 миллион нафар расидааст. Инфрасохтори пардохтии бонк зиёда аз 5,1 ҳазор POS-терминал, 375 банкомат ва 4829 QR-рамзи ягонаро дар бар мегирад.

Амонатбонк тавассути 75 филиал ва 547 маркази хизматрасонии бонкӣ дар тамоми шаҳру ноҳияҳои ҷумҳурӣ фаъолият мекунад. Чунин шабакаи васеъ имкон медиҳад, ки сокинони минтақаҳои дурдаст низ ба хизматрасониҳои молиявӣ дастрасӣ пайдо намоянд.

Дар фаъолияти бонк масъулияти иҷтимоӣ низ ҷойгоҳи муҳим дорад. Дар нимсолаи аввал ба Мактаб-интернати №5 барои кӯдакони имконияташон маҳдуди шаҳри Душанбе ба маблағи 105,6 ҳазор сомонӣ маводи хоҷагидорӣ ва хӯрокворӣ дастрас карда шудааст. Ҳаҷми умумии кумакҳои хайриявии бонк 122,1 ҳазор сомониро ташкил додааст.

Дар маҷмуъ, фаъолияти шашмоҳаи Амонатбонк нишон медиҳад, ки ин ниҳоди молиявӣ рушди нишондиҳандаҳои иқтисодиро бо дастгирии иҷтимоӣ, қарздиҳии мақсаднок ва ҷорӣ намудани технологияҳои муосир пайвастааст. Афзоиши эътимоди мизоҷон, тавсеаи маблағгузории соҳибкорӣ ба гузариш ба хизматрасониҳои рақамӣ замина мегузоранд, ки Амонатбонк минбаъд низ дар рушди иқтисоди миллӣ ва беҳтар гардидани сатҳи хизматрасонии бонкӣ саҳми назаррас гузорад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube