Бадахшон нақшаи даъватро дар рӯзи аввал 100% иҷро кард

Вилояти Мухтори Кӯҳистони Бадахшон, чун солҳои пеш, нақшаи даъвати тирамоҳии ҷавонон ба сафи Қувваҳои Мусаллаҳи Тоҷикистонро дар рӯзи аввали маърака иҷро кардааст.
 
Дар ин бора мақомоти иҷроияи ҳокимияти давлатии ВМКБ дар саҳифаи расмии худ хабар додаанд.
Маъракаи даъвати тирамоҳӣ имрӯз, 1 октябр, дар саросари кишвар оғоз шуд. Тибқи Фармони Президенти Тоҷикистон, шаҳрвандони ҷинси марди аз 18 то 27-сола, ки ҳуқуқи ба таъхир андохтани муҳлати даъват ё озод будан аз хизматро надоранд, моҳҳои октябр-ноябр ба сафи Қувваҳои Мусаллаҳ ва дигар сохторҳои ҳарбӣ даъват мешаванд. Бадахшон солҳои охир низ чанд бор аз аввалин минтақаҳое буд, ки нақшаи даъватро дар рӯзи нахуст иҷро кардааст. Масалан, 1 октябри соли 2025 вилоят иҷрои нақшаро ба 101 фоиз расонида буд, соли 2024 низ нақшаи даъвати тирамоҳӣ барзиёд иҷро шуда буд. Мақомоти вилоят иҷрои саривақтии нақшаро ба ҳисси масъулияти шаҳрвандӣ ва омодагии ҷавонон ба хизмати ҳарбӣ марбут медонанд. Барои мавсими баҳории соли 2026 низ ВМКБ нақшаи даъватро дар рӯзи аввал пурра иҷро карда буд.  
Маъракаи даъвати тирамоҳии соли 2026 то охири моҳи ноябр идома мекунад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube