Эътирози хонандагон дар Фаронса

Дар Фаронса эътирози хонандагони мактабҳои миёна, ки аз нимаи дуюми моҳи сентябр оғоз шуда буд, рӯзҳои охир зиёд шуда, дар чанд минтақа бо хушунат ва харобкорӣ табдил ёфт.

Вазири маорифи Фаронса Эдуард Жеффре 4 октябр эълон кард, ки аз оғози ин ҳаракат 24 муассисаи таълимӣ оташ зада ё хароб карда шуданд. Ба гуфтаи ӯ, рӯзи душанбе дар 400 то 500 литсей дарсҳо пурра ё қисман боздошта мешаванд, зеро шароити амниятӣ барои идомаи таҳсил фароҳам нест.

Дар маҷмӯъ, Фаронса тақрибан 3700 литсей дорад ва рӯзи ҷумъа низ дар 400–500 муассиса дарсҳо муваққатан қатъ шуда буданд.

Ҳамчунин, вазири маориф хабар додааст, ки аз оғози нооромиҳо 78 корманди низоми маориф ҷароҳат бардоштаанд.

Эътирози хонандагони синфҳои болоӣ аз минтақаҳои атрофи Париж оғоз шуда, баъдан ба дигар шаҳрҳои Фаронса паҳн гардид. Расонаҳои фаронсавӣ менависанд, ки хонандагон аз камбуди омӯзгорон, иваз нашудани муаллимони ғоиб, серодамии синфҳо, фарсуда будани биноҳои мактабӣ ва ҷадвали аз ҳад зиёди дарсӣ шикоят доранд.

Рӯзномаи Le Monde хабар медиҳад, ки танҳо 2 октябр 735 муассисаи таълимӣ таҳти таъсири эътирозҳо қарор гирифта буданд. Дар бархе минтақаҳо даргирӣ миёни эътирозгарон ва пулис ба амал омада, ҳолатҳои оташзанӣ ва ҳамла ба кормандони муассисаҳои таълимӣ низ сабт шудаанд.

Тибқи маълумоти Reuters, аз рӯзи душанбеи гузашта то 4 октябр дар саросари Фаронса тақрибан 5000 нафар боздошт шудаанд, ки қисми зиёди онҳоро наврасон ташкил медиҳанд. Даҳҳо нафари дигар дар ҷараёни нооромиҳо ҷароҳат бардоштаанд.

Ҳукумати Фаронса мегӯяд, талаботи марбут ба беҳбуди шароити таҳсилро мешунавад, аммо ҳамзамон амалҳои хушунатомез ва харобкориро маҳкум мекунад. Эдуард Жеффре бо намояндагони хонандагон, волидон ва иттифоқҳои касабаи соҳаи маориф мулоқотро оғоз кардааст.

Дар ҳамин ҳол, созмонҳои хонандагон ва иттифоқҳои касаба аз идомаи эътирозҳо хабар додаанд ва барои рӯзҳои наздик баргузории намоишҳои нав пешбинӣ шудааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube